MLS muntazam chempionati doirasida bo‘lib o‘tgan «Sinsinnati» va «Inter Mayami» (3:5) uchrashuvi yakunlanganidan so‘ng, tashkilotchilar bahsdagi so‘nggi gol muallifi borasidagi qarorini o‘zgartirdi.

Uchrashuvning 89-daqiqasida «shaharliklar» tomonidan kiritilgan gol avvaliga rasmiy saytda Lionel Messi nomiga yozilgan edi. Biroq bir necha daqiqa o‘tgach, liga rahbariyati ushbu vaziyatni qayta ko‘rib chiqib, golni «Sinsinnati» darvozaboni Roman Chelentanoning avtogoli sifatida qayd etdi.

Shu tariqa, 38 yoshli Messining ushbu o‘yindagi ko‘rsatkichi xet-trikdan dublga aylandi. Shuningdek, uning hisobida bitta golli uzatma ham bor. Ma’lumot uchun, Lionel Messi faoliyati davomida urgan rasmiy gollar soni endilikda 909 tani tashkil etmoqda.