Ёшлар ўртасидаги Осиё чемпионатининг "А" гуруҳидан чорак финалга чиққан жамоалар номи маълум бўлди. Учинчи тур ўйинлари драматик кўриниш олди.
Учинчи тур олдидан 4 очко тўплаб турган Яман терма жамоаси Таиландга қарши баҳс олиб борди. Яманликлар ўйиннинг 65-дақиқасида 2-1 ҳисобида олдинга чиқиб олди. Уларни дуранг ҳам чорак финалга олиб чиқарди. Аммо ўйининг 85 ва 88-дақиқаларида киритилган гол таиландликларга ғалаба келтириш билан бирга, Яманни гуруҳда қолдириб кетди. Таиланднинг учала голи Патипан Пинсермсутсри ҳисобига ёзилди.
Мусобақа мезбони Мьянма эса сўнгги турда Эронга ютқазганига қарамай, чорак финалга чиқди. Бугунги 0-2 ҳисобидаги мағлубиятдан кейин мьянмаликлар ҳисобидаги очколар сони тўртталигича қолди. Уларнинг тўплар нисбати 3-2 кўринишига келди. Яман ва Мьянма ўзаро ўйинда 0-0 ўйнаганини инобатга олсак, мезбон жамоа плей-оффга чиқди. Яманликлар 3-3 тўплар фарқи билан уйларига қайтадиган бўлишди.
Демак, "А" гуруҳида Таиланд (6 очко) биринчи, Мьянма (4 очко) иккинчи ўринни эгаллади.
Демак, Ўзбекистон терма жамоаси чорак йўлланмасини қўлга киритса, ушбу жамоалардан бири билан чорак финалда тўқнаш келади: гуруҳда 1-ўрин эгалланса — Мьянма, 2-ўрин банд этилса Таиланд рақибимиз бўлиши мумкин.
| № | Жамоа | Ўйин | Ғалаба | Дуранг | Мағлубият | Т-Н | Очко |
|---|---|---|---|---|---|---|---|
| 1 | Таиланд | 3 | 2 | 0 | 1 | 5-6 | 6 |
| 2 | Мьянма | 3 | 1 | 1 | 1 | 3-2 | 4 |
| 3 | Яман | 3 | 1 | 1 | 1 | 3-3 | 4 |
| 4 | Эрон | 3 | 1 | 0 | 2 | 3-3 | 3 |
