Ушбу мавсумда Ўзбекистон Кубоги соҳибига айланиш билан бир қаторда Ўзбекистон ХХIII миллий чемпионатининг кумуш медалларига эга чиққан Тошкентнинг “Локомотив” жамоаси ушбу ғалабалар муносабати билан 19 декабр куни “Ўзбекистон” меҳмонхонасининг тантаналар залида байрамона тадбир ўтказди.
Тантанали тақдирлаш маросими давомида “Ўзбекистон Темир Йўллари” ДАТК бошқарув раиси Раматов Ачилбай Жуманиязович Ўзбекистон Профессионал Футбол Лигаси бош директори Магомедов Фарҳод Абдувалиевичлар сўзга чиқиб, “темирйўлчилар”нинг бу мавсумда эришган муваффақиятларини алоҳида таъкидлаб ўтиб, келгуси йилда халқаро майдонлардаги мусобақаларда ҳам муносиб иштирок этишларини тилашди.
Шундан сўнг футболчиларга чемпионат кумуш медаллари ва эсдалик совғалар топширилди.
Байрамона тадбирда "Фано" гуруҳи, эстрада юлдузлари Улуғбек Раҳматуллаев, Ҳилола Ҳамидова ва Улуғбек Отажонов ўз қўшиқлари билан ўзгача завқ бағишлашди. Таниқли сўз устаси Шукурулло Исроилов эса йиғилганларни ўзининг ичакузди ҳангомалари билан қувонтирди.
Тадбир давомида катта экранда “Локомотив”нинг якунланган мавсумдаги ўйинларидан энг ёрқин лавҳалардан тайёрланган видео-ролик намойиш этилиб, кубок финали ҳақидаги лавҳалар олдидан ушбу ғалаба мархум Александр Шадринга бағишлангани таъкидлаб ўтилди.
Умуман олганда тадбир кўтаринки рухда ташкил этилиб, тақдирлаш маросими муносиб тарзда ўтказилди.
