Ўзбекистонлик теннисчи қиз Сабина Шарипова Туркиянинг Истанбул шаҳрида давом этаётган “Фьючерс” туркумига кирувчи ва мукофот жамғармаси 10 минг АҚШ долларидан иборат турнирдаги иштирокини ғалаба билан бошлади.
“OlamSport”нинг хабар беришича, мусобақанинг биринчи рақамли теннисчиси ҳисобланган ўзбекистонлик ракетка устаси илк даврада қийин ғалабага эришди.
Шарипова қирғизистонлик дугонаси Ксения Палкинага қарши кечган баҳснинг биринчи сетини 1:6 ҳисобида бой берди. Кейин 6:0 ҳисобида зафар қучиб, мувозанатни тиклади. Ҳал қилувчи учинчи сет тай-брекка қадар давом этди ва унда Шарипованинг қўли баланд келди.
24 декабрь куни ўзбекистонлик теннисчи чорак финал чиптасини тақдим этадиган учрашувда Валерия Уржумова билан муносабатларига ойдинлик киритиб олади.
Асосий тўрга саралаш баҳслари орқали етиб келган россиялик теннисчи илк даврада туркиялик Муаззез Демирчидан 6:2, 6:1 ҳисобида устун келди.
