Халқаро футбол тарихи ва статистикаси федерацияси (IFFHS) 2014 йил якунлари бўйича дунё клубларининг рейтингини эълон қилди.

Мадриднинг "Реал" жамоаси 381 очко билан рейтинг пешқадами сифатида эътироф этилди. "Қироллик клуби" 2014 йил давомида 4та соврин (Испания кубоги, ЕЧЛ, Европа суперкубоги, клублар ўртасида ЖЧ)ни қўлга киритди. "Бавария" (276) ва "Атлетико" (267) клублари эса кучли учликка киришди.

"Барселона" 251 балл билан тўртинчи, Колумбиянинг "Атлетико Насьонал" жамоаси эса 249,5 очко билан бешинчи ўринда қайд этилган. Шунингдек, кучли ўнликка "Ювентус" (Италия), "Арсенал" (Англия), "Наполи" (Италия), "Ривер Плейт" (Аргентина) ва "Зальцбург" (Австрия) жамоалари киришган.

IFFHSнинг 500талик рўйхатига Ўзбекистоннинг "Бунёдкор" (329-ўрин, 68 балл) "Пахтакор" (428-ўрин, 59 балл) ва "Локомотив" (483-ўрин, 54 балл) жамоалари киришган.

Рейтингнинг тўлиқ кўриниши билан IFFHS сайтида танишиб олишингиз мумкин.