Жанубий Корея терма жамоаси ҳужумчиси Нам Тэ Хи ("Лахвия", Қатар) ОФК томонидан 4000 АҚШ доллари миқдорида жаримага тортилди.

Футболчи 13 январь куни Жанубий Корея - Кувайт ўйинида айёрлик ишлатганлиги туфайли сариқ карточка билан жазоланган эди. Корейс футболчиси кувайтлик футболчи билан тўқнашиб кетган ва айёрона йиқилган эди. ОФК шу ўйиндаги вазият учун корейс футболчисини жаримага тортди. Нам Тэ Хи яна бир сариқ карточка олса, чоракфиналда майдонга туша олмасди. Ўзи шундоқ ҳам 2 нафар асосий ярим ҳимоячиларини йўқотган Жанубий Корея бош мураббийи Ули Штилике Нам Тэ Хини Австралияга қарши ўйинга туширмади.

Хабар берганимиздек, корейсларнинг Ку Жа Чол ("Майнц-05",Германия) ва Ли Чунг Ёнг ("Болтон", Англия) каби муҳим футболчилари жароҳатлари жиддийлиги сабаб ўз Ватанларига учиб кетишди. Катта эҳтимол билан Нам Тэ Хи чорак финалда Ўзбекистонга қарши ўйинда майдонда айнан шу йўқотилган футболчилар ўрнини эгаллайди.

Отабек Йўлдошев
Жанубий Корея, Сеул