Луиш Фигу ФИФА президентлиги учун сайловда ўз номзоди билан қатнашиши мумкин Яқин ўтмишнинг машҳур футболчиларидан бири бўлган португалиялик Луиш Фигу ФИФА президентлиги учун сайловда қатнашиш нияти ҳақида маълум қилган.

“Мен футболга бефарқ қола олмайман. Охирги йилларда футболнинг имижи салбий томонга ўзгариб кетди ва бу менга ёқмаяпти. Ҳозирда интернетдаги қидирув тизимларида “ФИФА” сўзини қидирувга берсангиз, ташкилот билан боғлиқ турли можаролар ҳақидаги хабарлар келиб чиқади. Буни ўзгартириш керак, футболга ярашмайди бу вазият. Мен бу вазиятни ўзгартиришни ният қилдим”, – дейди Фигу CNN телеканалига берган интервьюсида.

У ўзининг жуда кўп танишлари билан шу муаммолар ҳақида суҳбатлашганини, уларнинг аксар қисмидан олинган жавобларида “раҳбариятнинг ўзгариши” орқали муаммоларни ҳал қилиш мумкин экани айтилгани ҳақида билдириб ўтган.

“Мен Блаттерни ҳурмат қиламан. У 1998 йилдан бери ташкилотни бошқариб келмоқда. Лекин футболда бўлгани каби, сайловларда ҳам ким муносиб бўлса, ўша ғалаба қозониши керак”, – дейди Луиш Фигу.