Бугун замонамизнинг энг кучли футболчиларидан бири, уч карра "Олтин тўп" соҳиби, айни дамдаги жаҳоннинг энг яхши футболчиси Криштиану Роналду 30 ёшга тўлди.
1985 йилнинг 5 февраль куни Португалиянинг Мадейра оролида туғилган футболчи ўз фаолияти давомида катта ютуқларга эришди ва 29 ёшидаёқ Португалия тарихидаги энг яхши футболчи номини қўлга киритишга улгурди.
Уч карра Англия чемпиони (2007, 2008, 2009), Испания чемпиони, икки карра Европа Чемпионлар Лигаси ғолиби (2008 "МЮ" таркибида, 2014 "Реал" таркибида), икки карра клублар ўртасида жаҳон чемпиони бўлган футболчи кетма-кет икки йилдан бери жаҳоннинг энг яхши футболчиси номини ҳеч кимга бермай келмоқда.
Ўз иқтидори, катта меҳнати ва ўз касбига профессионал сифатида ёндошиши туфайли катта ютуқларга эришган Роналду бугун бутун футбол тарихидаги энг яхши футболчилар қаторида турибди.
Криштиану Роналдунинг футболчилик фаолиятига яна бир бор тўхталиш шарт эмас. Зеро, унинг бугунги кунда кўрсатаётган ўйини, бутун дунё футбол мутахассислари ва мухлислари томонидан эътироф этилишининг ўзи кифоя.
Сайт тахририяти номидан Криштану Роналдуга бундан ҳам юқори марраларни забт этиши, ҳали янгилашга улгурмаган рекордларни янгилаши, "Реал" ва терма жамоаси таркибида кўплаб ютуқларни қўлга киритишини ва ўз ўйини билан мухлисларни янада хурсанд қилишини чин дилдан тилаймиз.
Туғилган кунинг билан, Чемпион!
