Шанба куни "Барселона" Испания чемпионатидаги ўз вазифасини муваффақиятли бажарди. Ханс-Дитер Флик шогирдлари ўз майдонида "Вильярреал"ни 4:1 ҳисобида мағлуб этди. Энди "кўк-анорранглилар" Испания Кубоги ярим финали доирасидаги "Атлетико"га қарши ўз уйида бўлиб ўтадиган баҳсга тайёргарлик кўришади. Каталонияликлар Мадриддаги биринчи ўйинда қабул қилинган 0:4 ҳисобидаги мағлубиятдан сўнг вазиятни ўнглашлари керак бўлади.
"Бу осон бўлмайди... Лекин биз "Атлетико"га қарши камбэк қилишга ҳаракат қиламиз", — деди Флик "сариқ сув ости кемаси" устидан қозонилган ғалабадан сўнг.
"Барселона" ва "Атлетико" ўртасидаги учрашув сешанба куни, 3 март санасида бўлиб ўтади. "Камп Ноу" стадионидаги баҳс Тошкент вақти билан тунги соат 01:00 да (Москва вақти билан 23:00) бошланади.
