Япония футбол ассоциацияси баёнот бериб, миллий терма жамоани бошқариш учун 5 кишидан иборат номзодлар рўйхати борлигини маълум қилди. ЯФА техник директори Масахиро Симоданинг таъкидлашича, Япония терма жамоасини яна хорижлик мутахассис бошқаради.
Хабарингиз бор, мексикалик мутахассис Хавьер Агирре Осиё кубогидан кейин терма жамоа бошқарувидан истеъфога чиқарилганди. Унинг ўрнини эгаллайдиган мураббий билан Жей лиганинг янги мавсуми бошланадиган 7 март кунига қадар шартнома имзоланиши кутилмоқда. Япония миллий терма жамоаси 27 ва 31 март кунлари ўз майдонида Тунис ва Ўзбекистонга қарши ўртоқлик ўйинларини ўтказади.
"Биз беш кишидан иборта номзодлар рўйхатини тузиб олдик ва энди улар билан музокараларни бошлаймиз. Ҳозирда улар ҳақидаги маълумотларни тўплаяпмиз. Жей лига ўйинлари бошланганча шартнома имзолаб, янги мураббий янги футболчиларни кузатишни бошлашини хоҳлаймиз. Япон мураббийлари ёки Жей лига клубларида ишлаётган мутахассисларни терма жамоага жалб қилмаймиз. Хорижлик кучли мутахассисни терма жамоага таклиф қилиб, япон футболининг янада ривожланишини истаймиз. Дзаккерони ва Агирре футболимизнинг ривожига ўз ҳиссаларини қўшишди", - дейди Симода.
