"Реал Мадрид" ушбу мавсумда олтинчи ўйиндирки "Атлетико"га қарши ҳеч қандай чора топа олмади. Анчелотти жамоаси аввал Испания суперкубогини ўз ҳамшаҳарларига бой берди, сўнгра "Атлетико" "Реал"ни Испания кубогидан чиқариб юборди. Энди эса "матрасчилар" ўз ҳамшаҳарларининг чемпионликдан ҳам маҳрум бўлишларига сабабчи бўлиб қолишлари мумкин.
Диего Симеоне шогирдлари "Реал"ни ҳар томонлама мағлуб этишди. "Қаймоқранглилар" "Висенте Кальдерон"да ҳеч нарса қила олишмади. Ҳеч нарса! Тўғри, "Мадрид"га тажрибали марказий ҳимоячилар — Пепе ва Рамоснинг йўқлиги ҳам ўз таъсирини кўрсатмай қолмади. Роналдунинг майдонга қайтгани ҳам "Қироллик клуби"га ҳеч қандай наф бермади. Криштианунинг майдонда бор-йўқлиги деярли сезилмади.
Биринчи бўлимнинг 20-дақиқасигача "матрасчилар" томонидан урилган иккита гол "Реал"ни "нокдаун"га тушириб қўйди. Ўнг қанотдан тўп ҳаволатиб етказилган тўпни қайтариб, орқароққа етказилган тўпни Тиагу Мендеш кучли зарба билан дарвозага йўллади. Орадан 4 дақиқа ўтиб Сауль жуда чиройли гол муаллифига айланди. Сикейра чап томондан жарима майдончасига ёриб кирди, бир ҳимоячидан ўтиб кетиб, тўпни бироз орқароққа узатди. Сауль чалқанча услубда зарба йўллади. Тўп дарвоза устунига тегиб, тўрга бориб тушди. 2:0!
Ўйин бошида берилган 2та кучли зарба туфайли "Реал" ўйин охиригача ўзига кела олмади. Аксинча, мезбонлар ўзларини анча эркин ҳис қилиб, ўйинни ўзлари истагандек олиб боришди. "Атлетико" иккинчи бўлимда уюштирилган кўплаб ҳужумларнинг иккитасини гол билан якунлади. Ўйиннинг 67-дақиқасида Арда Турон жарима майдончаси ташқарисидан дарвозабон майдончаси бурчаги томон очилаётган Саулга пас берди. У бош билан тўпни нариги устун томон етказди. Варан тўпни тепиб юборишда сусткашликка йўл қўйди ва унинг ортида турган Гризманн тўпни дарвозага йўллади! Ўйин тугашига 1 дақиқа қолганидан эса Торреснинг ўнг қанотдан узатиб берган пасини Манжукич бош билан Касильяс дарвозасига йўллади.
Қишки танаффусдан кейин Анчелотти жамоаси аввалги формасига кира олмаётгани бор гап эди. Аммо жамоа ҳали бу даражада қақшатқич зарбага дуч келмаганди, ҳали бунчалик нурсиз ўйин кўрсатмаганди.
Ушбу ғалабадан кейин "Атлетико" "Реал" билан орадаги фарқни 4 очкога етказиб олди. "Барселона" эса эртага "Атлетик Бильбао"ни мағлуб этса, "Қироллик клуби" билан орадаги фарқни минимумгача қисқартиради.
Испания Ла лигаси, 22-тур
Атлетико – Реал Мадрид 4:0 (2:0, 2:0)
Голлар: 1:0 – 14 Тиагу, 2:0 – 18 Сауль, 3:0 – 67 Гризманн, 4:0 – 89 Манджукич.
Атлетико – Мойя, Хуанфран, Миранда, Годин, Сикейра, Тиагу, Габи, Коке (Сауль, 10; Гарсия, 71), Туран, Гризманн (Торрес, 77), Манджукич.
Реал Мадрид – Касильяс, Начо, Карвахаль, Варан, Коэнтрау, Иско (Ильярраменди, 68), Хедира (Хесе, 46), Бэйл, Кроос, Бензема (Эрнандес, 73), Роналду.
Огоҳлантиришлар: Кроос (29), Габи (45), Туран (49), Гарсия (52), Годин (54), Манджукич (82), Хесе (85).
