“Милан” ўзининг твиттердаги расмий саҳифасига “Ювентус”га қарши ўйинда туринликлар ҳужумчиси Карлос Тевес биринчи тўп киритилган вазиятда тўпни офсайддан қабул қилиб олганини исботловчи суратни жойлади.

“Сизнингча, бу чизиқлар параллелми? Бизнингча, йўқ”, — деб суратга изоҳ қолдирилган.

А Сериянинг 22-туридаги Туринда кечган ўйинда мезбонлар 3:1 ҳисобида ғалаба қозонишди. Тевес 14-дақиқада ҳисобни очганди, аммо ўша вазиятда аргентиналик офсайдда бўлганлиги тўғрисида кўп тортишувлар бўлди.

Кейинроқ “Милан” вице-президенти Адриано Галлиани “Ювентус”га ўзининг уй ўйинларидаги видеотрансляцияларга ўзгартириш киритишни, аниқроғи клуб ўзига хуш келмаган лавҳаларни намойиш қилмасликни маслаҳат берганди.