Навоийнинг “Қизилқум” жамоаси янги мавсум олдидан охирги синов-назорат учрашувини ўтказади.

Олий лига вакили “Бухоро” футболчилари билан кечадиган мазкур ўртоқлик ўйини ҳар икки жамоа келишуви билан Навоий вилоятининг Қизилтепа туманидаги “Дўстлик” стадионида 8 март куни бўлиб ўтади. Учрашув соат 11.00 да бошланади.

Хабарингиз бор, ўтган мавсумда ўз майдонидаги ўйинларда энг кўп томошабин тўплаш борасида “Қизилқум” жамоаси пешқадамлик қилди. Навоий шаҳрида ўтказилган ўн уч учрашувни бевосита стадионнинг ўзидан 158324 нафар мухлис кузатиб борди. Бу ўтган мавсумда олий лига жамоалари ўртасидаги энг юқори кўрсаткич сифатида эътироф қилинди.

Жамоа мухлислар клубининг билдиришича, бу анъана бу йил ҳам давом этади. “Қизилқум” жамоаси раҳбарияти ва Мухлислар клуби ташаббуси билан 8 март куни Қизилтепада ўтадиган ўйинда кончиларни қўллаб-қувватлаш истагида бўлган ишқибозлар учун Навоий шаҳридан махсус автобуслар ташкил этилади. Автобус 8 март куни соат 9.00 да Навоий шаҳридаги “Сўғдиёна” стадиони ёнидан Қизилтепа томон йўлга чиқади.

Мурожаат учун телефон — +998913333773.