Kun.uz: ФИФА Интизом қўмитаси Зимбабве терма жамоасини 2018 йилда Россияда бўлиб ўтадиган жаҳон чемпионатида иштирок этиши мумкин бўлганлар сафидан четлатди. Бу ҳақда ФИФА расмий сайтида маълум қилинган.
Бу терма жамоа cобиқ бош мураббийнинг маошини тўламаётгани учун жазоланган. Миллий федерация 2008 йилнинг мартидан ноябрь ойигача терма жамоани бошқарган бразилиялик мутахассис Валиньосонинг иш ҳақини бермагани учун ФИФА томонидан огоҳлантирилган эди. Аммо белгиланган муддатда ҳам африкаликлар мураббийнинг пулини беришмаган.
2013 йилнинг апрелида ҳам ФИФА Интизом қўмитаси Зимбабве футбол федерациясини мураббийнинг маошини тўламагани учун жаримага тортган эди. Ўшанда федерацияга 60 кун ичида мураббийдан бўлган қарзнинг бир қисми тўлаш, 120 кун ичида эса қарздан буткул қутилиш мажбурияти юкланган эди. Қўшимча сифатида навбатдаги жазо янада қаттиқроқ бўлишим терма жамоанинг ФИФА доирасидаги барча мусобақалардан четлатилиши мумкинлиги ҳақида огоҳлантириш берилганди.
Лекин ўтган вақт ичида қарзлар тўланмаган ва ФИФА Интизом қўмитаси Валиньосанинг мурожаатини қайтадан кўриб чиқиб, 60 кун ичида барча қарзлар тўланиши кераклиги ҳақида қарор чиқарган. Бундан ташқари терма жамоа ЖЧ-2018 саралаш босқичини ўз-ўзидан тарк этади.
Маълумот учун, Зимбабве терма жамоаси ФИФА рейтингида айни дамда 109 ўринда жойлашган. Жамоа ўз тарихида бирон марта ҳам мундиалда иштирок этмаган. 4 марта жанубий Африка минтақаси бўйича ўтказиладиган КОСАФА турнирида ғолиб бўлган.
