Oliy ligadagi barcha jamoalar qatori «Bunyodkor» ham yangi mavsumga tayyorgarlikning birinchi bosqichini davom ettiryapti. O‘zbekiston vise-chempioni o‘quv-mashg‘ulot yig‘inini jamoa akademiyasiga qarashli maydonda o‘tkazyapti. Unda asosiy tarkib futbolchilari bilan birga o‘tgan mavsum yoshlar ligasida chempionlikka erishganlar ham ishtirok etishmoqda. Yig‘in doirasida o‘rtoqlik uchrashuvlariga alohida e’tibor qaratilyapti. Xususan, «Olmaliq»qa qarshi kechgan bahs «qaldirg‘ochlar»ning 2:0 hisobidagi g‘alabasi bilan yakunlandi. Har ikki gol Doston Hamdamov hisobiga yozildi. Biz mazkur o‘yindan so‘ng Osiyoning 2015 yilgi eng yaxshi yosh futbolchisidan intervyu oldik.

- Doston, garchi o‘rtoqlik uchrashuvi bo‘lsada, g‘alaba qozonish hamisha yoqimli. Boz ustiga, «Olmaliq» darvozasiga kiritilgan to‘plarga aynan siz mualliflik qildingiz. Mavsumlar oralig‘ida o‘tkazilgan ilk bahs haqida fikringiz qanday?

- O‘yindan ham, natijadan ham ko‘nglimiz to‘ldi. Har holda, murabbiylarimiz futbolchilarning xatti-harakatlaridan qoniqish hosil qilishdi. Hali to‘p bilan to‘laqonli mashg‘ulotlar o‘tkazilmayapti. Shunga qaramay, bugungi o‘yinimiz yaxshi chiqdi. Uchrashuvni tomosha qilish uchun kelgan kamsonli muxlislarimizni xushnud qildik, deb o‘ylayman. Hozirda asosiy e’tibor jismoniy tayyorgarlikka qaratilgan. Mashg‘ulotlarning katta qismi trenajyor zalida o‘tkazilyapti.

- Bugun tarkibda juda ko‘p yosh futbolchilarni ko‘rdik. Ular haqida nima deya olasiz?

- «Bunyodkor» akademiyasi o‘z mevasini bera boshladi. Bizdan keyingi avlod vakillari ham ancha ko‘zga tashlanib qolishdi. Fikrimga jamoamizning yoshlar ligasidagi chempionligi isbot bo‘ladi. Ana shu tarkibdagi ayrim futbolchilar yangi mavsumda asosiy tarkibdan joy olishsa, shaxsan men bundan ajablanmayman. Elbek Ravshanov, Shahzod Abdurahimov, Nodir Mavlonov, Georgiy Pogosov, Davron Umirov, Javohir Qahramonov, Nuriddin To‘xtasinov, Farrux Ikromov kabi o‘yinchilar bugungi o‘yinda ham maydonda yo‘qolib qolishmadi.

- 2016 yilgi mavsum jamoangiz uchun ancha qiyin kechdi. Bir yo‘la uchta musobaqada ishtirok etishga to‘g‘ri keldi. Hamon charchoq alomatlari sezilyaptimi?

- Yo‘q, desam yolg‘on gapirgan bo‘laman. Lekin professional futbolchi charchoq nimaligini bilmasligi kerak. Biz yosh futbolchilar esa bu haqda umuman o‘ylamasligimiz lozim.

- Shaxsan o‘zingiz uchun ham yil omadli keldi. Davlat mukofotiga loyiq ko‘rildingiz...

- Bundan juda ham xursandman. O‘zbekiston Belgisi ko‘krak nishoni bilan taqdirlandim. Ochig‘i, buni kutmagan edim. Vatanimiz obro‘si, shon-shuhratini yuksaltirish, uning xalqaro nufuzini yanada oshirishga xizmat qilayotgan, mamlakatimizning ijtimoiy-siyosiy hayotida faol ishtirok etib, tengdoshlariga namuna bo‘layotgan yoshlar orasida menga ham bu mukofot nasib qildi. Mustaqilligimizga 25 yil to‘lgan yilda qo‘lga kiritilgan bu nishon men uchun kutilmagan sovg‘a bo‘ldi. Ushbu mukofotimni yurtdoshlarimizga, «Bunyodkor» jamoasi muxlislariga bag‘ishlayman.

- Lekin mavsum siz uchun biroz notekis o‘tdi. O‘yiningizda pasayishlar kuzatildi. Buning sabablarini izlab ko‘rdingizmi?

- Bu borada bir narsa deyish qiyin. Inson hech qachon o‘ziga xolis baho bera olmasa kerak. Menimcha, juda ko‘p o‘yinlar bo‘ldi. Shu bois, ayrim uchrashuvlarda charchoq alomatlari sezildi. Qolaversa, yosh futbolchilar bir tekis o‘yin namoyish eta olishmaydi. Umuman, mavsum «Bunyodkor» uchun omadli keldi. Mavsum yakunlariga ko‘ra kumush medallarni qo‘lga kiritdik. Nisbatan olganda, yosh tarkib uchun bu ijobiy natija.

- Oldinda jamoangizni OCHLning «pley-off» uchrashuvi kutib turibdi. Raqib ancha jiddiy. «Bunyodkor» «Al-Jaish» to‘sig‘idan o‘ta oladimi?

- Shunga astoydil harakat qilamiz. Guruh bosiqichiga chiqishimiz uchun 7 fevral kuni safarda «Al-Jaish» klubini mag‘lubiyatga uchratishimiz kerak. Bu jamoa ayni payt Qatar yulduzlar ligasida peshqadamlar safida bormoqda, tarkibida sobiq jamoadoshimiz Sardor Rashidov to‘p suryapti. Bu klub o‘tgan mavsum OCHLning chorak finaliga qadar yetib bordi. Agar uchrashuvda g‘alaba qozonsak, Saudiya Arabistonining «Al-Ahli», Eronning «Zob-Ohan» hamda BAAning «Al-Ayn» klublari joylashgan «S» guruhini to‘ldiramiz. Hozir bor e’tiborimiz mana shu o‘yinga qaratilgan.

- «Al-Jaish» jamoasini o‘rganishni boshladinglarmi?

- Murabbiylar shtabi va klubimizning mas’ul xodimlari raqib jamoa haqidagi ma’lumotlarni to‘plashyapti. Qatar, umuman, arab jamoalari legioner futbolchilarga tayangan holda harakat qilishadi. Maydonda katta hajmdagi ishni aynan xorijlik futbolchilar bajarishadi. Shuni inobatga olgan holda legionerlari o‘rganilyapti. Shu jumladan, Sardor Rashidov ham har qanday jamoa himoyachilariga jiddiy xavf tug‘dira oladi. «Pley-off» bitta o‘yindan iborat bo‘ladi. Mazkur uchrashuvga har qanday holatda ham kuchli tayyorgarlik ko‘rish mumkin.

- Oliy ligaga tashlangan qur’a haqida nima deysiz?

- Men uchun qur’a nisbiy tushuncha. Baribir, 15ta jamoaning barchasi bilan ikki davrada o‘ynaymiz. Agar uchrashuvlarga astoydil tayyorgarlik ko‘rilsa, «Barselona»ni ham yutish mumkin.