Bugun “Bunyodkor” akademiyasi maydonida «Navbahor» Toshkent yig‘inidagi navbatdagi nazorat uchrashuvini o‘tkazdi.
O‘yinda namanganliklarga “Bunyodkor” klubining asosiy va yoshlar tarkibi a’zolaridan tashkil topgan jamoa raqiblik qildi.
Uchrashuvning birinchi bo‘limi yakunlanishi arafasida hisob ochildi. Hasanboy Ergashev raqib posboni tomonidan qaytarilgan to‘pni darvozaga yo‘llab, «Navbahor»ni oldinga olib chiqdi. Tanaffusdan keyin «Navbahor» ikkinchi golni ham urishga erishishdi. Ro‘zimboy Ahmedov “Bunyodkor” posboni bilan yakkama-yakka vaziyatda yakuniy zarbani berishda xatoga yo‘l qo‘ymadi. Uchrashuv yakuniga qadar boshqa gol kuzatilmadi va “Navbahor” 2:0 hisobida g‘alaba qozondi.
«Navbahor» uchrashuvni quyidagi tarkibda o‘tkazdi: Asilbek Omonov, G‘iyos Komilov, Hasanboy Ergashev, Alisher Samatov, Jahongir Mehmonov, A’zam Aliyev, Dilshod Jabborov, Azizbek Turg‘unboyev, Oybek Qilichev, Mirzohid G‘ofurov, Ro‘zimboy Ahmedov. Zaxiradan maydonga tushganlar: Ravshan Xursanov, Tohir Shamsitdinov, Alisher Mirzayev, Akmal Ortiqov, Alisher Mahmudov, Abbos Otaxonov, Abduaziz Sultanov.
Bu safargi uchrashuvda kichik jarohatlari borligi sababli Ilhom Boydedayev va Nemanya Yovanovich ishtirok etishmadi. Darvozabon Nodir Ashurmatov esa zaxirada qoldirildi.
