O‘z vaqtida "Neftchi" jamoasi o‘rinbosarlar safida faoliyat olib, keyinchalik Farg‘ona shahrining "Istiqlol" jamoasiga ijara asosida o‘tib ketgan Rizo Ayvazov yana "Neftchi" safiga qaytdi va jamoa bilan ikki yillik shartnoma imzoladi.
1995-yili tavallud topgan hujumchi o‘tgan mavsumni "Istiqlol" safida muvaffiyatli o‘tkazdi. Misol tariqasida Ayvazov "Istiqlol" tarkibida 10 ta o‘yin o‘tkazib 17 marta raqiblar darvozasini ishg‘ol etib yana "Neftchi" murabbiylarining e’tiborini tortdi. Rizo endilikda jamoadagi Sherzod Hakimov, Otabek Isroilov va Mo‘ydin Mamazulumov kabi tajribali hujumchilar bilan bir jamoa safida o‘ynaydi. Bu esa o‘z-o‘zidan Ayvazov uchun ko‘p narsani anglatadi. Yosh hujumchi "Neftchi" PFK bilan shartnoma imzolaganidan so‘ng jamoaning internetdagi rasmiy portali uchun intervyu berdi.
- "Neftchi" safida tajribali o‘yinchilar yig‘ilgan. Men ulardan ko‘p narsa o‘rganmoqchiman. Jamoaning har bir a’zosi singari men ham "Neftchi"ning g‘alabalarida, salmoqli natijalarida o‘z hissamni qo‘shmoqchiman. Hali yoshman. Shunday ekan marrani kengroq olib MTJmiz vakili bo‘lish uchun astoydil harakat qilmoqchiman. O‘zimdan ancha tajribali va mahoratli futbolchilar bilan mashg‘ulotlar menga ko‘p narsa beryapti. Raqobatdan qo‘rqmayman. Sof raqobat bor joyda o‘sish kuzatiladi. Andrey Fyodorov bilan gaplashdim. Murabbiy ko‘p narsa o‘zimga bog‘liq ekanligini ta’kidladi. Muxlislarga esa salomatlik tilayman. Ishqibozlar ham bizning jamoamiz a’zosi hisoblanishadi. Bejizga ularni 12-o‘yinchi deyishmaydi, - dedi Ayvazov.
