O‘zbekiston boks federasiyasi Uzbek Tigers jamoasining Butunjahon boks seriyasidan joy olgan China Dragons’ga qarshi tarkibini e’lon qildi. Undan Rio—2016 da O‘zbekiston sharafini himoya qilgan birorta ham bokschi joy olmagan.
Uzbek Tigers tarkibida Rio—2016 oltin medalini qo‘lga kiritgan Hasanboy Do‘stmatov va Shahobiddin Zoirov, shuningdek, sovrindorlar qatoridan joy olgan Shahram G‘iyosov, Murodjon Ahmadaliyev, Bektemir Meliqo‘ziyev kabi charm qo‘lqop ustalari mashg‘ulot o‘tkazayotgandi. Biroq ular Xitoyga jo‘nab ketadigan bokschilar qatorida e’tirof etilmagan.
China Dragons’ga qarshi Rio—2016 yo‘llanmasini qo‘lga kiritganiga qaramay Xurshid Tojiboyevning soyasida qolgan va Braziliya safaridan tushib qolgan Elnur Abduraimov jang qiladi. Uning qatorida Mironshoh Ibragimov, Abdulhay Shorahmatov, Ulug‘bek Haqberdiyev va Bobur Yo‘ldoshev ham Xitoyga boradi.
Uzbek Tigers tarkibi
49 kg: Mironshoh Ibragimov
56 kg: Abdulhay Shorahmatov
64 kg: Elnur Abduraimov
75 kg: Ulug‘bek Haqberdiyev
91 kg: Bobur Yo‘ldoshev.
Terma jamoani To‘lqin Qilichev va Rahmatjon Ro‘ziohunov murabbiy sifatida Xitoyga olib boradi. Jamoaning tibbiy masalalariga Komil Rasulov javobgar bo‘ladi.
Ma’lumot uchun, 3 fevral kuni Uzbek Tigers va China Dragons bokschilarini taroziga tortish marosimi bo‘lib o‘tadi. 4 fevral kuni esa xitoyliklarning besh nafar bokschisi yuqorida nomlari keltirilgan sportchilarga qarshi birma-bir ringga chiqadi. Mazkur guruhda, shuningdek, Qozog‘istonning Astana Arlans va Rossiyaning Boxing Team jamoalari bor.
O‘zbekiston Butunjahon boks seriyasidagi debyutini 2016 yilda boshlab, ilk urinishidayoq yarim finalga yetib borgan va bo‘lajak chempion Cuba Domadores’ga imkoniyatni boy bergandi.
