"Navbahor" Samarqandning “Dinamo” jamoasiga qarshi nazorat o‘yinini o‘tkazdi.

Gollarga boy o‘tgan bahsda 4:2 hisobi qayd etildi. Uchrashuv boshida Oybeq Qilichev Aziz Turg‘unboyevning uzatib bergan to‘pidan keyin hisobni ochgan bo‘lsa oradan biroz vaqt o‘tib, samarqandliklar o‘rtadagi muvozanatni tiklashdi.

Bo‘lim oxirida Abbos Otaxonov burchakdan oshirib berilgan to‘pni boshi bilan darvozaga joylab qo‘ydi. Ikkinchi bo‘lim boshida “Dinamo” futbolchilari ikkinchi bor hisobni tenglashtirishdi.

Raqibdan kuchliroq ekanliklarini amalda namoyish etgan "Navbahor" hakamning final xushtagi chalingunga qadar yana ikki bor muvaffaqiyat qozondi. Avvaliga Nemanya Yovanovich burchakdan oshirilgan to‘pni to‘rga joylab qo‘ygan bo‘lsa, o‘yindagi so‘nggi golga Mirzohid G‘ofurov mualliflik qildi. G‘ofurov ikki himoyachi qurshovida bo‘lishiga qaramay o‘ng qanotdan uzatilgan to‘pni mo‘ljalga aniq yo‘llay oldi.

Ilhom Mo‘minjonov “Dinamo”ga qarshi o‘yinda quyidagi futbolchilarni maydonga tushirdi: Asilbek Amanov, Abbos Otaxonov, Hasanboy Ergashev, Tohir Shamshitdinov,  Alisher Samatov, Azizbek Turg‘unboyev, Alisher Mirzayev, Oybek Qilichev, Timur Tolipov, Ro‘zimboy Ahmedov, Nemanya Yovanovich.

Zaxiradan maydonga tushganlar: Akmal Ortiqov, Mansur Saidov, Dilshod Jabborov, A’zam Aliyev, Jahongir Mehmonov, Mirzohid G‘ofurov, Ravshan Xursanov, Ilhom Boydedayev, Abduaziz Sultanov.

“Navbahor” navbatdagi nazorat uchrashuvini 14 fevral kuni “Buxoro” jamoasiga qarshi o‘tkazadi.