Angliya Premyer Ligasining navbatdagi turida “Suonsi”dan mag‘lubiyatga uchragan Klaudio Raneri shogirdlari 18-o‘rinda borayotgan “Xall Siti”dan atigi bir ochkoga oldinda bormoqda. Voqealar rivoji shu tarzda ketadigan bo‘lsa, “tulkilar” “shaharliklar”ning tarixiy anti-rekordini takrorlashi mumkin.

“Suonsi” klubining ishlari so‘nggi paytlarda ancha o‘ngidan kelmoqda. So‘nggi to‘rt uchrashuvda 3 g‘alaba qozongan “Suonsi” xavfli zonadan biroz uzoqlashgandek. Mouson va Olssonlarning kiritgan gollari “Lester” ustidan g‘alaba qozonishga yetarli bo‘ldi. Jamoaga Pol Klementning kelishi Uels jamoasiga ijobiy ta’sirini ko‘rsatmoqda, shekilli.

Premyer Ligada 14-mag‘lubiyatini qabul qilib olgan “tulkilar” esa xavfli zonadan bor-yo‘g‘i 1 ochko oldinda bormoqda. Shu tariqa Jeymi Vardi jamoadoshlari ketma-ket beshinchi mag‘lubiyatini qabul qilishdi. O‘tgan mavsumda esa “Lester” atigi uch bora mag‘lubiyatga uchragandi xolos.

Raneri vaziyatdan chiqa oladimi?

O‘tgan yilgi natijalarini ko‘rsatishga “Lester”da hech qanday imkoniyat yo‘q. Biroq, Angliyaning amaldagi chempionlari chempionatda jon saqlab qolishlari mumkin. Bunday voqea ro‘y bermasa, “Lester” “Manchester Siti” kabi chempionlikni qo‘lga kiritgandan so‘ng keyingi mavsumda Premyer Ligani tark etgan ikkinchi jamoaga aylanib, tarix zarvaraqlarida qolishi mumkin.

Premyer Ligada “shaharliklar” bunday natijaga ega yagona jamoa hisoblanishadi. “Manchester Siti” 1937-yil mayida o‘z tarixida ilk Premyer Liga chempionligini qo‘lga kiritgan bo‘lsa, birr yil o‘tib, 1937/1938-yilgi mavsum yakuniga ko‘ra 22 jamoa ichida 21-o‘rinni band etgan. Chempionatning eng hujumkor jamoasi (80 gol) bo‘lishi ham «Siti»ni Premyer Ligada saqlab qololmagan.

Hozircha Klaudio Raneri shogirdlari hujumda eng yomon natija ko‘rsatayotgan uchinchi jamoa hisoblanadi. Chempionat tugashiga 13 tur qolgan bir paytda, italiyalik murabbiy vaziyatni o‘nglay oladimi ? Buni esa vaqt ko‘rsatadi, albatta.