Hozirda Angliya Premyer Ligasida 2-o‘rinda borayotganiga qaramay, “Manchester Siti” barqaror jamoa degan ta’rifdan ancha uzoq.
Darvozabonda xotirjamlikning yetishmasligi
Xosep Gvardiola “Manchester Siti” boshqaruviga kelgach, darvozabon ham faol qatnashishi kerak bo‘lgan o‘yin sxemasini amalga oshira boshladi. Buning uchun bosh murabbiy Jo Hart xizmatlaridan voz kechdi va o‘rniga Klaudio Bravoni jamoaga olib keldi. 7 oydan ortiq vaqt o‘tgach ma’lum bo‘ldiki, murabbiy darvozabon tanlashda adashgan ko‘rinadi. Chililik posbon oyoq bilan o‘ynashda benuqson bo‘lsada, haqiqiy xaloskor bo‘lishdan ham ancha yiroqda. Premyer Liganing oxirgi uch o‘yinida jamoa Villi Kabalero bilan maydonga tushib, barchasida g‘alaba qozondi. Kabalero esa atigi bitta gol o‘tkazib yubordi. Argentinalik posbonning bugungi bahsda asosiy tarkibda tushish ehtimoli yuqori bo‘lsada, Gvardiola uni jamoaning asosiy posboni sifatida ko‘rayotgani yo‘q.
Kuchsiz himoya
Bu yilgi mavsumda barcha musobaqalarni hisoblaganda, “Manchester Siti” 38 uchrashuvning 26 tasida o‘z darvozasidan kamida bir gol o‘tkazib yuborgan. Klaudio Bravoning xatolari bunga sabab bo‘lgandir, biroq, jamoa himoyasi ham ideal darajada emasligi ayon. Kelayotgan yoz mavsumida Pep Gvardiolani himoya chizig‘ini qayta qurib chiqishi aniq. Sababi murabbiy Sanya, Sabaleta, Kolarov va Klishining ishidan qoniqmoqda, deya olmaymiz. Hozircha himoyada eng qimmat himoyachilardan biri Nikolas Otamendi ishonchliroq o‘yin namoyish etmoqda. Jamoa sardori Vensan Kompanining boshi jarohatlardan chiqmayotgan bir paytda, Falkao, Jermeyn yoki Mbappe “shaharliklar” himoyasiga xavf sola olishlari mumkin.
Kuchli raqib bosimini yengishdagi qiyinchilik
Jamoaning Premyer Ligadagi (“Chelsi”, “Arsenal”, “Liverpul”, “Tottenxem”, “Manchester Yunayted”, “Everton” va “Lester”, amaldagi chempion) va Chempionlar Ligasidagi o‘yinlari va natijalariga nazar tashlaydigan bo‘lsak, “katta” jamoalarga qarshi Serxio Aguero va jamoadoshlari qiyin ahvolda qolishmoqda. Ushbu raqiblarga qarshi (12 uchrashuv) klub 7 mag‘lubiyat, 2 durang va 3 g‘alabaga erishgan. g‘alabalar esa “Arsenal”, “Manchester Yunayted” va “Barselona”ga qarshi bahslarda erishilgan.
