Albatta, bu yangilik emas. Joze Mourinyo Madridning «Real» klubi bosh murabbiyi bo‘lgan davrlarda ham braziliyalik hujumchi Neymarni o‘z jamoasi safida ko‘rishni istagan, biroq u «Barselona»ni afzal bilgan edi. Portugaliyalik mutaxassis esa o‘z istagidan «Manchester Yunayted»da ham voz kechmagan ko‘rinadi.

Ispaniyaning Sport nashri xabariga ko‘ra, Joze Mourinyo bu ish bilan shaxsan o‘zi shug‘ullanmoqda. «Manchester Yunayted» bosh murabbiyi braziliyalik yulduzga bir necha marta qo‘ng‘iroq qilib, uni Barselonadan Manchesterga ko‘chib o‘tishga ko‘ndirishga uringani aytilmoqda.

Neymarga «Manchester Yunayted» taqdim etadigan katta maoshdan tashqari unga sport nuqtai nazaridan ham foyda bo‘lishi va’da qilinmoqda. Jumladan, «mankunianlar» safida braziliyalik futbolchiga «Barselona»dagidan muhimroq rol berilishi va Angliya Premyer Ligasidagi keskin raqobat esga olingan.

Mourinyo o‘z jamoasiga olib kelishni istagan yulduzlar bilan shaxsiy aloqalarini yaxshilayotgani kuzatilgan. Zero, portugaliyalik murabbiy sovrinlar yutish uchun o‘ta yuksak saviyadagi hujumchiga muhtojligini biladi.

Ushbu mavsumda uning jamoasi 38 ta gol urgan bo‘lib, ulardan 15 tasiga Zlatan Ibrahimovich mualliflik qilgan bo‘lsa, shvesiyalik hujumchidan keyingi o‘rinlarda Xuan Mata (6 gol) va Pol Pogba (4 gol) bormoqda.

To‘purarlar ro‘yxatida boshqa biror hujumchining yo‘qligi Mourinyoni tashvishga solishi tabiiy. Bu ko‘rsatkich, bir qator urinishlar, jumladan Antoni Marsial misolidagi tajribalarga qaramay yaxshilanmagan. Dribling ustasi bo‘lgan Neymar esa Premyer Ligaga yangi havo olib kelish bilan birga o‘z texnikasi va tezligi evaziga «Manchester Yunyted»ning hujumdagi ehtiyojlarini to‘liq qondira oladi.