Yoshlar Birinchiligining 1-turidan o‘rin olgan "Navbahor" - "Obod" uchrashuvida "Obod" o‘rinbosarlari irodali g‘alabani qo‘lga kiritdi. Bellashuvdan keyin toshkentliklar ustozi Vyacheslav Tigayning fikrlari bilan qiziqdik.   - Mavsumning birinchi o‘yini bo‘lgani bois, jamoadagi kamchiliklar yaqqol ko‘rindi. Hisob 1:1 bo‘lib turganida pala-partishlik kuzatildi, ammo bundan mezbonlar foydalana olishmadi. Aslida buni to‘g‘ri tushunish kerak. Chempionatning birinchi o‘yini, safarda, hayajon bo‘lishi tabiiy. Maydon egalari ham g‘alaba uchun o‘ynaydi va o‘z-o‘zidan bosim bo‘ladi. Meni xursand qilgani shu bo‘ldiki, shogirdlarim bugun g‘alaba uchun borlarini berib harakat qilishdi. Birinchi bo‘limda qanot himoyachimizning xatosidan keyin o‘z darvozamizdan to‘p olib chiqqan bo‘lsakda, yigitlar qo‘llarini tushirgani yo‘q. Qolaversa, tanaffusda amalga oshirgan o‘zgarishlarimiz ham o‘z samarasini berdi, deb bemalol ayta olaman. Maydonga tushgan futbolchilar o‘yinimizni o‘zgartirishdi, kuchaytirish, desam mubolag‘a bo‘lmaydi. Natijada avvaliga hisobni tenglashtirdik. Hakam tomonidan qo‘shib berilgan daqiqalarda esa, juda muhim golni urdik. Himoyachimiz kerakli vaqtda jarima maydoni ichida paydo bo‘ldi va g‘alaba to‘pini kiritdi.