"Lokomotiv" futbol klubi bugun matbuot anjumani tashkil qilib, jamoa bilan shartnoma imzolagan yangi futbolchilar bilan keng ommani tanishtiruv marosimini o‘tkazdi. Xabaringiz bor, mavsumlar oralig‘ida "temiryo‘lchilar" safini 6 nafar futbolchi tark etgan bo‘lsa, 7 nafar yangi o‘yinchi jamoaga qo‘shildi. Yangi futbolchilar — Shuhrat Muhammadiyev ("Nasaf"), Diyor Turopov ("Olmaliq"), Jaloliddin Masharipov ("Paxtakor"), Salamat Quttiboyev ("Buxoro"), Murod Bobojonov ("Neftchi"), Muhmmad Kone (Kot-d'Ivuar), Nyore Krizo (Kot-d'Ivuar).
Marosimning ilk qismida klub bosh direktori o‘rinbosari To‘labek Akromov jamoaning maqsadlari haqida to‘xtalib o‘tdi.
"Jamoamiz qishki o‘quv-mashg‘ulot yig‘inlarini asosan Birlashgan Arab Amirliklarida olib bordi. Biz boshlangan yangi mavsumda ham oldimizga maksimal vazifalarni qo‘ydik. Bu yil ham O‘zbekiston chempionligi va O‘zbekiston kubogini qo‘lga kiritishni maqsad qilganmiz. Shuningdek, Osiyo chempionlar ligasida finalgacha yetib borishni ko‘zlayapmiz. Umid qilaman, bu maqsad yo‘lida futbolchilar qo‘ldan kelgan barcha ishni qilishadi".
Shuningdek, "Lokomotiv" bosh murabbiyi Andrey Miklyayev jamoaning seleksiya siyosati borasida o‘z fikrlarini bildirib o‘tdi.
"Yig‘in davomida bir nechta futbolchilarni ko‘rikdan o‘tkazib, o‘zimiz uchun kerakli bo‘lgan pozisiyalarga o‘yinchilarni tanlab oldik. Yangi shartnoma tuzgan futbolchilarning ayrimlarida jarohatlar borligi sababli, ular dastlabki rasmiy o‘yinlarda bizga yordam bera olishmadi. Ular jarohatdan forig‘ bo‘lib, umumiy guruhda mashg‘ulotlarni boshlashdi. Mart oyi so‘ngida terma jamoalar o‘yinlari tufayli yuzaga keladigan tanaffusdan keyin ular yaxshi formaga kirib olishadi, deb umid qilaman".
Shundan so‘ng o‘yinchilarga futbolkalar topshirildi va ular "Lokomotiv"ga o‘tishi qanday yuz bergani haqida ma’lumot berib o‘tishdi.
Nyore Krizo:
— "Lokomotiv" katta klub hisoblanadi. Shuning uchun bu jamoaga o‘tishga qaror qildim. Bu klub safida o‘sishga erishaman deb o‘ylayman. Buning uchun bu yerda barcha sharoitlar mavjud. Dastlabki taassurotlarim ijobiy. Klubdagi muhit ham yaxshi. Men bu yerga kelganimda klub rahbariyati meni jamoaning rivojlanish loyihasi bilan tanishtirishdi. Unda klub Osiyoning eng yaxshi klublaridan biriga aylanishi ko‘rsatilgandi. Bu esa menga ma’qul keldi. Bundan tashqari, menda Osiyo chempionlar ligasida o‘z kuchimni sinab ko‘rish ishtiyoqi tug‘ildi. Bu jiddiy musobaqa.
Muhammmad Kone:
— Men ham "Lokomotiv"da o‘sishga erishishni maqsad qilganman. Klubda yaxshi saviyadagi futbolchilar yig‘ilgan. Bu yerda har kuni nimadir o‘rganyapman. Bu esa futbolchi sifatida yanada o‘sishimga yordam beradi.
O‘zbekiston futboli haqida ilk tasavvurga 2011 yili Qatarda bo‘lib o‘tgan Osiyo kubogida ega bo‘lgandim. O‘shanda O‘zbekiston terma jamoasi yaxshi o‘yin ko‘rsatgandi.
Avvalgi mavsumda Kipr chempionatida to‘p surgandim. O‘zbekiston va Kipr futbolini taqqoslaydigan bo‘lsam, har bir mamlakat futboli bir-biridan oz bo‘lsa-da farq qiladi. To‘g‘ri, Kipr Yevropada joylashgan, ammo bu yerda ham yaxshi saviyadagi futbolchilar ko‘p.
Salamat Quttiboyev:
— Jamoa taklif bilan chiqqani uchun bu jamoaga o‘tishga qaror qildim. "Lokomotiv" yaxshi shakllangan jamoa. Shuningdek, jamoa Osiyo chempionlar ligasida ishtirok etadi va men ham turnirda o‘z sinab ko‘rishni istadim. Ushbu jamoa safida o‘z o‘yinimda yanada rivojlantiraman, degan niyatdaman.
Jaloliddin Masharipov:
— Osiyo chempionlar ligasida o‘ynash uchun "Lokomotiv" taklifini qabul qildim desam ham bo‘ladi. OCHLda imkon qadar uzoqroqqa — finalgacha yetib borish niyatimiz bor. Yigitlar bilan harakat qilib, jamoaning Oliy liga va O‘zbekiston kubogida g‘oliblikni qo‘lga kiritishida yordam berishga harakat qilaman.
"Paxtakor"ga qarshi o‘yinlarda ishtirok etamanmi? Menimcha, yo‘q. Boisi, ikki klub rahbarlari shunga kelishishgan.
Diyor Turopov:
— "Lokomotiv" O‘zbekistonning amaldagi chempioni hisoblanadi, klub Chempionlar ligasida ishtirok etadi, jamoa tarkibida kuchli futbolchilar yig‘ilgan. Shuning uchun jamoa rahbariyatidan tushgan taklifni qabul qildim. Futbolchi raqobat bor joyda o‘ynasa, u o‘sishga erishadi. Bu futbolning asosiy qoidasi.
Murod Bobojonov:
— Yanvar oyida "Neftchi" mashg‘ulotida ishtirok etayotgandim. "Lokomotiv" rahbariyati "Neftchi"ga taklif bilan chiqdi. Men esa bu taklifga rozi bo‘ldim. "Lokomotiv"da o‘zimni yaxshi tomondan ko‘rsatib, klubning jamoaviy o‘yiniga yaxshi qo‘shilib ketishni va barcha sovrinlarni qo‘lga kiritishda yordam berishni istayman. Har bir futbolchi doimo o‘sib borishni istaydi. Bunda menga "Loko"dagi faoliyatim yordam beradi, deb o‘ylayman.
Shuhrat Muhammadiyev:
— "Lokomotiv" bir-ikki yildan beri menga taklif bilan chiqardi, ammo "Nasaf"da faoliyatimni davom ettirib kelayotgandim. Bu safar esa taklifga rozilik berdim. OCHLda munosib ishtirok etib, sovrinli o‘rinni egallashga harakat qilamiz.
Jamoani o‘yiniga asta-sekin moslashib boryapman. Himoyada o‘ynasamda, xuddi "Nasaf"da bo‘lganidek jamoaning hujumkor o‘yinida faol ishtirok etishga harakat qilaman.
Tanishtiruv marosimida futbolchilarga o‘zlari to‘p suradigan formalar topshirildi.
