Parijda qayd etilgan 0:4 hisobi «Barselona» bosh murabbiyi Luis Enrike uchun har tomonlama og‘riqli zarba bo‘ldi. Birinchidan, uning shundoq ham «qimirlab» turgan kursisi qattiqroq «tebrana» boshladi. Harqalay, Kataloniya klubi rahbariyatining yangi bosh murabbiy izlash ishlarini kuchaytirgani haqida xabarlar yo‘q emas. Ikkinchidan, bu mag‘lubiyat Enrikening keyingi istiqboliga ham ta’sir o‘tkazishi mumkin.
* * * Matbuot xodimlari Luis Enrikening «Barselona» bosh murabbiyi sifatidagi faoliyatini batafsil tahlil etishga kirishdilar. Statistika bo‘yicha aytsak, asturiyalik mutaxassis superklubni shu kunga qadar 163ta rasmiy o‘yinga boshlab tushib, ularning 124tasi (76 foiz)da g‘alabani ta’minladi.
Luis Enrike futbolchi rolida «Real» bilan 1 marta, «Barselona» safida esa 2 marta Ispaniya chempioni maqomiga erishgan.
----------------------------------------
Enrike butsalarini mixga ilganidan so‘ng 2005-2008 yillar oralig‘ida marafon musobaqalarida 4 marta ishtirok etdi - AQSH, Gollandiya, Italiya va Marokashda.
* * * Luis Enrike futbolchi sifatida ikki azaliy raqib - «Real» va «Barselona» safida o‘ynagan va har ikkisi bilan mamlakat chempioni bo‘lgan.
* * * Sovrinlar masalasida ham Enrikening natijasi chakki emas. Deylik, u qisqa faoliyati davomida klub bilan imkoni bor barcha sovrinlarni qo‘lga kiritishga ulgurdi.
* * * 2ta 8:0 - bu Enrikening «Barselona» boshqaruvida qayd etgan eng yirik hisobli g‘alabasi. Murabbiy shuning barobarida 2 marta 0:4 ko‘rinishidagi salbiy hisobga yuz tutdi.
«Barselona»ni kim boshqaradi?
Italiya matbuoti tarqatgan xabarga ko‘ra, «Barselona» rahbariyati «Yuventus» bosh murabbiyi Massimiliano Allegri xizmatlariga qiziqish bildirmoqda. Oldinroq 49 yoshli mutaxassisning mavsum yakunida turinliklar bilan xayrlashishi mumkinligi haqida xabarlar tarqalgandi. «Barselona» sport direktori Ariyedo Brayda «Milan»dagi faoliyati orqali Allegrini yaxshi biladi. Aynan u Massimilianoni eng munosib nomzod sifatida ko‘rmoqda. Shuningdek, «Everton» ustozi Ronald Kuman nomzodi ham bor. U Angliya jamoasi bilan yangi shartnoma tuzishdan bosh tortdi. SFR Sport1 esa Kataloniyaliklarning «Bordo» va «PSJ» klublari hamda Fransiya termasi sobiq bosh murabbiyi Loran Blan bilan muzokara olib borgani haqida xabar tarqatdi. Eslatma, Blan 1996-1997 yillar mavsumida «Barselona» sharafini himoya qilgan. Xullas, Luis Enrikening kelajagi mavhum. Uning shartnomasi joriy mavsum yakunida o‘z kuchini yo‘qotadi. Enrikening o‘zi kelajagi xususida aprelgacha bir to‘xtamga kelishini aytgandi.
