Butunjahon boks seriyasining (WSB) VII mavsum «C» guruhi 4-turi doirasida O‘zbekistonning Uzbek Tigers jamoasi 18 mart, shanba kuni Toshkentdagi «O‘zbekiston» sport majmuasida Xitoyning China Dragons bokschilariga qarshi bahs olib borib, 5:0 hisobida g‘alaba qozondi va mavsumdagi ikkinchi g‘alabasini rasmiylashtirdi.

Shu kuni guruh peshqadami – Qozog‘istonning Astana Arlans bokschilari o‘z uyida Rossiyaning Patriot Boxing Team jamoasiga qarshi bahs yuritdi va 4:1 hisobida zafar quchdi. «C» guruhi 4-turidan keyin qozog‘istonlik bokschilar jamoasi birorta mag‘lubiyatsiz 12 ochko bilan 1-o‘rinda bormoqda va muddatidan oldin pley-offga chiqqan. 2 ta mag‘lubiyat va 2 ta g‘alabadan keyin Uzbek Tigers ochkolari sonini 6 taga yetkazib, guruhda 4-pog‘onadan 2-o‘ringa ko‘tarilib oldi.

«A» guruhida Kolumbiyaning Colombia Heroicos bokschilari ham nimchorak final masalasini hal qilib ulgurgan. O‘tgan yilgi chempion – Kubaning Cuba Domadores bokschilari ham katta ehtimol bilan pley-offga yo‘l oladi.

«B» guruhida vaziyat biroz chigallashgan. Bir yo‘la 3 jamoa hisobida 7 ochko mavjud. Ularning barchasi qolgan janglarda faqat g‘alaba uchun ringga chiqishini taxmin qilish qiyin emas.

Ma’lumot o‘rnida, WSB doirasida Uzbek Tigers 2017 yil hisobidan 4 ta jang o‘tkazdi. O‘zbekistonlik bokschilar avvaliga Xitoyda China Dragons’dan 2:3 hisobida yengilgan bo‘lsa, keyin Qozog‘istonda Astana Arlans’ga 1:4 hisobida imkoniyatni boy bergandi. Toshkentda bo‘lib o‘tgan 3-turda Uzbek Tigers Rossiyaning Patriot Boxing Team jamoasini 5:0 hisobida taslim qilishga erishdi. 4-turda esa O‘zbekiston jamoasi China Dragons’ni 5:0 hisobida yutdi va safardagi mag‘lubiyat uchun revansh oldi.

Uzbek Tigers guruh bosqichi 5-turini 1 aprel kuni Toshkentda Astana Arlans’ga qarshi o‘tkazadi. So‘nggi turda esa O‘zbekiston jamoasi Rossiyaga safar uyushtirib, 22 aprel kuni Patriot Boxing Team bilan kuch sinashadi.