Бутунжаҳон бокс сериясининг (WSB) VII мавсум «C» гуруҳи 4-тури доирасида Ўзбекистоннинг Uzbek Tigers жамоаси 18 март, шанба куни Тошкентдаги «Ўзбекистон» спорт мажмуасида Хитойнинг China Dragons боксчиларига қарши баҳс олиб бориб, 5:0 ҳисобида ғалаба қозонди ва мавсумдаги иккинчи ғалабасини расмийлаштирди.

Шу куни гуруҳ пешқадами – Қозоғистоннинг Astana Arlans боксчилари ўз уйида Россиянинг Patriot Boxing Team жамоасига қарши баҳс юритди ва 4:1 ҳисобида зафар қучди. «C» гуруҳи 4-туридан кейин қозоғистонлик боксчилар жамоаси бирорта мағлубиятсиз 12 очко билан 1-ўринда бормоқда ва муддатидан олдин плей-оффга чиққан. 2 та мағлубият ва 2 та ғалабадан кейин Uzbek Tigers очколари сонини 6 тага етказиб, гуруҳда 4-поғонадан 2-ўринга кўтарилиб олди.

«А» гуруҳида Колумбиянинг Colombia Heroicos боксчилари ҳам нимчорак финал масаласини ҳал қилиб улгурган. Ўтган йилги чемпион – Кубанинг Cuba Domadores боксчилари ҳам катта эҳтимол билан плей-оффга йўл олади.

«B» гуруҳида вазият бироз чигаллашган. Бир йўла 3 жамоа ҳисобида 7 очко мавжуд. Уларнинг барчаси қолган жангларда фақат ғалаба учун рингга чиқишини тахмин қилиш қийин эмас.

Маълумот ўрнида, WSB доирасида Uzbek Tigers 2017 йил ҳисобидан 4 та жанг ўтказди. Ўзбекистонлик боксчилар аввалига Хитойда China Dragons’дан 2:3 ҳисобида енгилган бўлса, кейин Қозоғистонда Astana Arlans’га 1:4 ҳисобида имкониятни бой берганди. Тошкентда бўлиб ўтган 3-турда Uzbek Tigers Россиянинг Patriot Boxing Team жамоасини 5:0 ҳисобида таслим қилишга эришди. 4-турда эса Ўзбекистон жамоаси China Dragons’ни 5:0 ҳисобида ютди ва сафардаги мағлубият учун реванш олди.

Uzbek Tigers гуруҳ босқичи 5-турини 1 апрель куни Тошкентда Astana Arlans’га қарши ўтказади. Сўнгги турда эса Ўзбекистон жамоаси Россияга сафар уюштириб, 22 апрель куни Patriot Boxing Team билан куч синашади.