O‘zbekiston milliy terma jamoasi 23 mart kuni Suriyaga qarshi JCH-2018 saralash bahsini o‘tkazishidan xabaringiz bor. Uchrashuv Malayziyada bo‘lib o‘tadi.

Mazkur bellashuv Malayziyaning Seremban shahridagi Tuanku Abdul Rahman Stadium stadionida bo‘lib o‘tishi rejalashtirilgandi. Biroq, stadion o‘yinga tayyor bo‘lmagani uchun Suriya va O‘zbekiston bahsi Malakka shahridagi 40 ming muxlisga mo‘ljallangan Hang Jebat Stadium maydoniga ko‘chirildi.

Xo‘sh, o‘yin bo‘ladigan kuni Malakka shahrida qanday ob-havo bo‘lishi kutilmoqda? Ma’lumotlarga qaraganda, payshanba kuni ushbu shaharda kuchli yomg‘ir yog‘ishi taxmin qilinmoqda. O‘yin boshlanadigan payt — mahalliy vaqt bilan 20:00ga kelib yomg‘irning tempi pasayishi va o‘yin davomida to‘xtashi kutilmoqda.

Uchrashuv paytida havo harorati 27-28 daraja atrofida issiq bo‘ladi. Havoning nisbiy namligi 75-80 foizni tashkil qiladi.

Eslatib o‘tamiz, Suriya va O‘zbekiston o‘rtasidagi o‘yin Toshkent vaqti bilan 17:00da boshlanadi. Terma jamaomiz mahalliy sharoitga moslashish maqsadida o‘yindan 4 kun oldin Malayziyaga yetib borib, u yerda mashg‘ulotlarni olib bormoqda.