17-18 mart kunlari Toshkent shahrida WSB guruh bosqichining navbatdagi janglari o‘tkazildi.

An’anaga ko‘ra, WSB har turdan so‘ng eng yaxshi bokschini aniqlash uchun so‘rovnoma tashkil etdi. Ushbu so‘rovnomada “Kolumbiya Heroicos” jamoasidan Palasio Karrillo (81 kg), “Astana Arlans” a’zosi Zafir Safiullin (60 kg) va "Uzbek Taygers"dan Shaxram G‘iyosov (69 kg) nomzodi o‘rin olgan edi. Yakunda, hamyurtimiz o‘z raqiblariga nisbatan katta farq bilan so‘rovnoma g‘olibiga aylandi. Shaxram G‘iyosov jami berilgan ovozlarning 87%ini qo‘lga kiritdi.

O‘z g‘alabalarini futbolchi Krishtianu Ronaldu uslubida nishonlaydigan bokschimiz ushbu turda "Chayna Dragons" jamoasi a’zosi Lui Veyga umuman imkoniyat qoldirmagan holda, 3:0 hisobida zafar quchgan edi.

So‘rovnomaning keyingi o‘rinlarda kolumbiyalik Palasio Karrillo 7%, va qozog‘istonlik Zafir Safiullin 6% ovoz to‘plashdi.

Eslatib o‘tamiz, “Uzbek Taygers” jamoasi “C” guruhida 6 ochko bilan pley-off masalasini hal etib bo‘lgan “Astana Arlans”dan (12) keyingi ikkinchi o‘rinda bormoqda. 1 aprel kuni bo‘lib o‘tadigan turda hamyurtlarimiz Toshkentda aynan “Astana Arlans” jamoasiga qarshi ringga ko‘tarilishadi. Mazkur uchrashuvdagi g‘alaba o‘zbek jamoasi uchun juda muhim.