Suriya va O‘zbekiston terma jamoalari o‘rtasidagi JCH-2018 saralash bahsi oldidan kecha suriyaliklar bosh murabbiyi Ayman Hakim ham matbuot anjumanida ishtirok etdi.

"O‘zbekistonga qarshi o‘yin biz uchun katta ahamiyatga ega. Malayziyada o‘quv-mashg‘ulot yig‘inini o‘tkazdik, ammo o‘rtoqlik o‘yinida maydonga tusha olmadik. Umid qilaman, bu narsa ertangi o‘yinda bizga katta ta’sir ko‘rsatmaydi.

O‘yin boshqa shaharga, boshqa stadionga ko‘chirilgani bizga bog‘liq bo‘lgan ishlar emas. Shunga qaramay, biz faqat g‘alaba uchun maydonga tushamiz.

To‘rt yillik tanaffusdan keyin terma jamoaga qaytgan Firas al-Hatibdan ko‘p narsa kutyapman. Boisi, uning tajribasi katta.

O‘zbekistonga qarshi o‘yinda g‘alaba qozonsak, 5 kundan keyin Janubiy Koreyaga qarshi bo‘ladigan bahsda bizga qo‘shimcha kuch beradi. Shuning uchun ertaga faqat g‘alaba qozonishimiz kerak. Shunda millionlab suriyaliklarga xursandchilik hadya qilishimiz mumkinligini bilamiz", - dedi Ayman Hakim.

Eslatib o‘tamiz, Suriya va O‘zbekiston o‘rtasidagi o‘yin bugun Toshkent vaqti bilan 17:00da boshlanadi.