Kecha basketbol muxlislari Yevropa ligasining muntazam chempionatidan o‘rin olgan “El-klasiko” guvohiga aylanishdi. Unda “Real Madrid” basketbolchilari “Barselona” klubiga qarshi parketga tushdi.
Bu mavsumda omadsizlik ko‘chasiga kirib qolgan kataloniyaliklar muddatidan avval pley-off bosqichiga chiqishdan mosuvo bo‘lib ulgurishdi. “Real” esa aksincha turnir jadvalida peshqadamlik qilmoqda.
Mazkur bahsda ham yuqoridagi omillar muhim rol o‘ynadi va unda “Real” qiyinchiliksiz o‘z raqibini mag‘lub etdi. Bahs davomida “Barselona” bosh murabbiyi Georgios Bartsokas hakamlar bilan tortishganligi sabab ikkinchi chorak yakuni arafasida bahsdan chetlatildi. Bu esa mehmonlarning imkoniyatini yanada pasaytirib yubordi. Yakunda “Real Madrid” 85:69 hisobida zafar quchib peshqadamlikni saqlab qoldi.
Yevroliga.
Muntazam chempionat.
27-tur.
Real Madrid Ispaniya – Barselona Ispaniya
85:69 (22:13, 19:14, 23:24, 21:18)
Real Madrid: Serxio Yul (21), Ayon (14), Rendolf (13), Teylor (3), Machyulis (2) – start; Tompkins (9), Kerroll (8), Xanter (8), Donchich (5), Rudi Fernandes (2).
Barselona: Rays (12), Tomich (12), Oleson (9), Perperoglu (7), Klaver (5) – start; Koponen (11), Renfro (5), Navarro (4), Vezenkov (3), Diane (1), Eriksson (0).
