So‘nggi yillarda yurtimizda yosh murabbiylar oliy liga jamoalarini boshqarib kelishmoqda.   Bular qatoriga "Navbahor" bosh murabbiyi Ilhom Mo‘minjonovni ham qo‘shsak bo‘ladi. O‘z navbatida Namangan jamoasi yosh mutaxassislarga tajriba vazifasini o‘tab berayotgan jamoalardan biri sanaladi. Ushbu so‘zimizga misol sifatida Baxtiyor Ashurmatov, Rashid G‘ofurov, Ravshan Bozorovni qo‘shsak bo‘ladi.
Ilhom Mo‘minjonov boshchiligida "Navbahor" yangi mavsumda Oliy ligada 3 ta uchrashuv o‘tkazgan bo‘lib, uchchala uchrashuvda 3 xil natija qayd etildi. Tarkib yomon tuzilmagan. Futbolchilar ham bir-birlari bilan maydonda yaxshi til topisha olishmoqda. Faqatgina murabbiyda biroz tajriba yetishmayotgani o‘tkazilgan uchrashuvlarda namoyon bo‘ldi.

Jamoa o‘yinida shijoat bor, lekin o‘ylab to‘p surilmayapti. Hujumlar asosan bir qanotdan amalga oshirilyapti. Maydon markazidan kirib keskinlik yaratilmayapti. "Neftchi"ga qarshi kechgan uchrashuvda farg‘onaliklar "Navbahor"ning o‘yin uslubini tezda fahmlab, jamoamizni qiyin holatga tushirib qo‘ygandi.

Haqiqattan ham, Ilhom Mo‘minjonovda tajriba kamlik qilmoqda. Lekin bu bilan Mo‘minjonov bilan jamoa uzoqqa bora olmaydi va shunga o‘xshash fikrlar bildirishdan yiroqmiz. Murabbiyni mavsumga hozirlik ko‘rayotgan mahalda ko‘kka ko‘targan ayrim "muxlislar" 3-4 ta o‘yindan xulosa chiqarib har xil fikrlar bildirishmoqda. Albatta, bu noto‘g‘ri. Avvalo muxlislar jamoa murabbiylariga ishlash uchun imkoniyat berishlari lozim! Ana o‘shanda ushbu mutaxassislar bilan "Navbahor" nimagadir erishishi mumkin bo‘ladi.