"Nasaf"-"So‘g‘diyona" (4:0) uchrashuvi nihoyasiga yetgach, mezbonlar ustozi Ro‘ziqul Berdiyev o‘z fikrlari bilan o‘rtoqlashdi.
"Bugungi o‘yinda biz raqibga bosim o‘tkaza oldik. Raqibni xato qilishga majbur qildik. Birinchi bo‘lim o‘rtalarida o‘yinimizni bo‘shashtirib yubordik. Raqib esa bundan foydalanishga harakat qildi va vaziyatlar yaratishga urindi.
Bugungi uchrashuvdagi g‘alaba haqli ravishda qo‘lga kiritildi. Uchrashuv hisobi bundan ham yirikroq bo‘lishi mumkin edi. Ammo shogirdlarim bir qancha vaziyatlardan unumli foydalana olmadilar. Bugun yigitlar maydonda erkin harakat qilishdi.
Biz jamoaviy o‘yin namoyish etamiz. Maydonga tushgan barcha o‘yinchilarimiz o‘zlariga yuklatilgan vazifalarni to‘liq ado etishdi. Bugungi g‘alabaga hamma birdek hissa qo‘shdi.
Jarohati tufayli keyingi paytlarda Farruh Sayfiyev xizmatidan foydalana olmayapmiz. Shukurki, u hozir umumiy guruh mashg‘ulotlariga qaytdi. Umid qilamanki, keyingi o‘yinlarimizda ushbu tajribali o‘yinchimiz maydonga tushishga tayyor bo‘lib qoladi. Darvozabonimiz Eldorbek Suyunov hozir to‘liq mashg‘ulotlarda ishtirok etmoqda. U maydonga tushishga tayyor. U keyingi o‘yinlarda bizga albatta yordam beradi" - dedi Berdiyev.
