Poytaxtimizda 8, 10, 12, 14, 16, 18 yoshgacha bo‘lgan o‘g‘il-qizlar o‘rtasida shaxmat bo‘yicha Osiyo chempionati bo‘lib o‘tmoqda.
Osiyo chempionati uch yo‘nalishda – standart, rapid va blis bo‘yicha o‘tkazilmoqda. Chempionatning shveysarcha tizimda yetti turdan iborat rapid bahslarida mamlakatimiz sportchilari 3 oltin, 4 kumush va 3 bronza medalni qo‘lga kiritib, umumjamoa hisobida birinchi o‘rinni egalladi.
O‘n olti yoshgacha o‘g‘il bolalar o‘rtasidagi bahslarda ishtirok etgan Shamsiddin Vohidov etti imkoniyatdan olti ochko jamg‘arib, Osiyo chempionatining oltin medaliga sazovor bo‘ldi. O‘n sakkiz yoshgacha o‘g‘il bolalar bahsida Ortiq Nig‘matov yetti partiyadan olti ochko to‘plab, shohsupaning eng yuqori pog‘onasiga ko‘tarildi. O‘n sakkiz yoshgacha qizlar bahsida Gulruhbegim Tohirjonova yetti partiyaning beshtasida g‘alaba qozonib, ikkitasida durang natija qayd etdi va birinchi o‘rinni egalladi.
O‘z yosh toifasida Afro‘za Hamdamova, Shahrombek Karimov, Akobirxon Saydaliyev, Nilufar Yoqubboyeva kumush medalni qo‘lga kiritdi. Humoyun Sindorov, Abdulbosit Sharifjonov va Georgiy Shvanov bronza medal bilan taqdirlandi.
