«Real» klub televideniyesi La Liganing 2-turida «Espanyol»ga qarshi o‘tkazilgan uchrashuvdagi hakamlikni keskin tanqid qildi.

Uchrashuvning 3-daqiqasida kataloniyaliklar yarim himoyachisi Aleks Kalatrava raqib vingeri Vinisius Juniorni yiqitdi va shundan so‘ng yerda yotgan braziliyalik futbolchining orqasiga oyog‘i bilan zarba berdi. Bosh hakam Xose Mariya Sanches Martines 26 yoshli ispaniyalik futbolchini jazolamadi.

«Sanches Martines unga sariq kartochka ko‘rsatmadi. Bu mursiyalik hakamning o‘yindagi ilk jiddiy qarori edi va u keyin ham shu ruhda davom etdi. VAR xonasida ishlagan Figeroa Vaskes ham xuddi shunday yo‘l tutdi.

Vinisiusni o‘yindan chiqarish uchun unga nisbatan qayta-qayta qoida buzildi va bu follar jazosiz qoldi. Lamin Yamalga nisbatan esa arzimas qoidabuzarlik uchun ham sariq kartochka ko‘rsatiladi», — dedi «Real» klub telekanali boshlovchisi.