«Bavariya» sharafini himoya qilayotgan Robert Levandovski jamoaning asosiy yulduziga aylanib ulgurgan. Polshalik futbolchi o‘z gollari bilan muxlislarini xursand qilmoqda. Yaqinda Levandovski Sport Bild nashriga intervyu berdi. Quyida ana shu suhbatni o‘qishingiz mumkin.
- Bugungi kunda jahonning eng mashhur klubi hisoblangan Madridning «Real»i bilan kechadigan ikkita o‘yindan nimalar kutyapsiz?
- Nima uchun «Real» eng mashhur? Jamoamiz tarkibida ham jahon darajasidagi yulduzlar madridliklarnikidan kam emas. Umuman, bu holat o‘yinning yanada qiziqarliroq bo‘lishini ta’minlaydi. Klubdagilar 2014 yilgi natijani unutishmagan. O‘shanda o‘z maydonimizda 0:1, safarda esa 0:4 hisobida imkoniyatni boy berganmiz. Ushbu natijalar ham bu gal yanada kuchliroq harakat qilishimizni ta’minlaydi. Albatta, «Real»ga qarshi kechadigan bahsga alohida tayyorgarlik ko‘ryapmiz va unda o‘zimizning eng yaxshi futbolimizni namoyish qilmoqchimiz.
- «Real»dan bo‘lgan taklifga qaramay, siz «Bavariya» bilan yangi shartnoma imzoladingiz. Bu bilan Karl-Xayns Rummenigge hozirgi «Bavariya» o‘z tarkibida eng yuqori saviyali futbolchilarni olib qolishga qodirligini isbotladi...
- «Bavariya»da futbolchilar uchun barcha sharoitlar yaratilgan. Bu yerda o‘sishingiz, yuqori natijalarni qayd etishingiz mumkin. Bir so‘z bilan aytganda, sharoitlar o‘sha «Real»nikidan kam emas. Shuningdek, «Bavariya» - men yuqori natijalarni qayd etishni istaydigan klub. Misol uchun, joriy mavsumda o‘zimiz ishtirok etayotgan barcha turnirlarda g‘olib chiqish imkoniyatiga egamiz.
- Ayni payt koleksiyangizda xalqaro turnir kubogi yo‘q...
- Balki shuning uchun ham Chempionlar Ligasida g‘olib chiqishni juda istayotgandirman. Bu maqsadga erishish uchun qo‘limdan kelganini qilaman. Joriy mavsum ustunlikka egamiz. Chunki hal qiluvchi o‘yinlar oldidan barcha futbolchilarimiz sog‘- salomat va yaxshi formada.
- Sport Bild o‘quvchilari eng yaxshi futbolchini aniqlashda sizni Krishtianu Ronaldu, Leo Messi va Neymardan yuqoriga qo‘yishdi...
- Albatta, bu yoqimli. Muxlislar nafaqat gollarimni, balki jamoa uchun mehnat qilayotganimni ham qadrlashadi.
- «Oltin to‘p»ni qo‘lga kiritishni istaysizmi?
- Eng avvalo, jamoaviy o‘yin hisoblangan futbol a’zosiman. Shu bois ham men uchun «Bavariya»ning g‘alabalari muhimroq. Lekin individual reytinglar va mukofotlar meni qiziqtirmaydi, desam aldagan bo‘laman. Albatta, mendan «Oltin to‘p»ni olishni istaysanmi, deb so‘rashsa, shubhasiz, xohlayman, deb javob beraman. Buning ustiga: agar Chempionlar Ligasida g‘alaba qozonsak, «Oltin to‘p»ni olish imkoniyatlarim oshadi. Demak, individual mukofotni qo‘lga kiritishda jamoaviy yutuqning ahamiyati katta.
- Xosep Gvardiola qo‘l ostida jamoangiz qatorasiga uch marta YECHL yarim finalidan chiqib ketdi. U ketgach nima o‘zgardi?
- So‘nggi yillarda omadimiz kelmaganining sababi - hal qiluvchi o‘yinlarga yaxshi formada yetib bormagandik. Bundesligada raqiblardan ancha o‘zib ketganimizning ahamiyati yo‘q. Biz har bir o‘yinda o‘z darajamizda harakat qilib, e’tiborsizlik qilmasligimiz kerak.
- «Borussiya» (Myonxengladbax)ga qarshi uchrashuvda Aryen Robbenga pas bermadingiz. Shundan so‘ng u ajablandi. Bu vaziyat haqida nima deya olasiz?
- O‘sha vaziyatda Aryen o‘yindan tashqari holatga tushib qolishi mumkin, deb o‘yladim. Shu bois ham to‘pni darvoza tomon tepishga qaror qildim.
- Bundesliga to‘purarlari orasida Pyer-Emerik Obameyangni ortda qoldiryapsiz...
- To‘g‘risini aytsam, to‘purarlar reytingiga unchalik qiziqmayman. Faqatgina chempion bo‘lganimizdan so‘ng bunga e’tibor qarataman.
