Angliyaning "Manchester Siti" klubi asosiy tarkib futbolchilarining 10 nafaridan qutilmoqchi.

Birinchi navbatda shaharliklar ijara asosida to‘p surayotgan futbolchilariga bo‘layotgan takliflarga e’tiborini qaratadi. Ular - darvozabon Jo Hart ("Torino"), himoyachilar Elyakim Mangala ("Valensiya") va Jeyson Denayer ("Sanderlend"), yarimhimoyachilar Samir Nasri ("Sevilya") hamda hujumchi Uilfrid Boni ("Stok Siti"). Shuningdek, bu ro‘yxatga Vensan Kompani va Fernando ham kiritilishi mumkin.

Klub yozda darvozabon Klaudio Bravo, himoyachi Aleksandr Kolarov va hujumchi Nolito bilan ham shartnomani bekor qilishni ko‘rib chiqmoqda. Lekin bu futbolchilarga o‘rinbosar topilsagina sotiladi.

Agar "Manchester Siti" bu futbolchilarni barchasini sotsa, unda taxminan 100 million funt mablag‘ ishlab olishi mumkin bo‘ladi. Bu kelishuvlar klubga ancha foydali bo‘lishi mumkin. Sababi, mazkur futbolchilarning ayrimlari jamoa bilan katta miqdordagi mablag‘ga shartnoma imzolagan. Bu borada shaharliklar faqat ikki futbolchi Jo Hart va Uilfrid Boni narxini biroz tushirib berishi mumkin. Boni "Suonsi"dan 28 million funt evaziga harid qilingan bo‘lsa-da, jamoa uni ikki barabar past narxga ham pullashga tayyorligi aytilmoqda.

Jo Hartga keladigan bo‘lsak, uni APL jamoalaridan ko‘ra boshqa chempionat klublariga sotilishi ehtimoli yuqori. Agar chet el jamoalari darvozabonga kam pul to‘laydigan bo‘lsa, unda APLdagi biror raqib jamoa taklifi ko‘rib chiqiladi.

Eslatib o‘tamiz, avvalroq "Manchester Siti" jamoasi bosh murabbiyi Pep Gvardiola yozda klubda katta o‘zgarishlar qilishini aytgan edi.