Ispaniyaning 3-divizionida ishtirok etuvchi «Eldense» klubining kelishilgan o‘yinlari soni 5ta ekani aniqlandi.

Cope nashri xabariga ko‘ra, klub futbolchilari Italiya va Xitoyning jinoiy guruhlari bilan til biriktirib olgan. Dastlab, 18 fevral kuni «Vilyarreal B» (0:4) klubiga qarshi o‘yin sotilgan. Uchrashuvdan oldin, o‘yinda kamida 3ta gol urilishi, hisobdagi farq esa kamida 2 gol bo‘lishi uchun katta miqdorda pul tikilgan. Firibda ishtirok etgan futbolchilar 60 ming yevro ishlab olgan.

Shundan so‘ng, xuddi shu tarzda «Atletiko Baleares» (0:5), «Kornelya» (1:3) va «Gava» (0:1) klublariga qarshi o‘yinlar sotilgan. «Barselona B» (0:12) klubiga qarshi o‘yinda esa futbolchilar 150 ming yevro ishlab olgan. 

Kelishilgan o‘yinlarda ishtirok etgan futbolchilarning har biri umumiy hisobda 200 – 500 ming yevro mablag‘ ishlab olgan. Ayni paytda tergov harakatlari davom etmoqda.