Испаниянинг 3-дивизионида иштирок этувчи «Эльденсе» клубининг келишилган ўйинлари сони 5та экани аниқланди.

Cope нашри хабарига кўра, клуб футболчилари Италия ва Хитойнинг жиноий гуруҳлари билан тил бириктириб олган. Дастлаб, 18 февраль куни «Вильярреал Б» (0:4) клубига қарши ўйин сотилган. Учрашувдан олдин, ўйинда камида 3та гол урилиши, ҳисобдаги фарқ эса камида 2 гол бўлиши учун катта миқдорда пул тикилган. Фирибда иштирок этган футболчилар 60 минг евро ишлаб олган.

Шундан сўнг, худди шу тарзда «Атлетико Балеарес» (0:5), «Корнелья» (1:3) ва «Гава» (0:1) клубларига қарши ўйинлар сотилган. «Барселона Б» (0:12) клубига қарши ўйинда эса футболчилар 150 минг евро ишлаб олган. 

Келишилган ўйинларда иштирок этган футболчиларнинг ҳар бири умумий ҳисобда 200 – 500 минг евро маблағ ишлаб олган. Айни пайтда тергов ҳаракатлари давом этмоқда.