Shimoliy va Markaziy Amerika va Karib havzasi futbol konfederesiyasi (KONKAKAF) JCH-2026 mezbonligi masalasini tezroq hal qilinishiga erishmoqchi.
Hozircha mezbonlik uchun faqat AQSH, Kanada va Meksika birgalikda ariza tashlaganlar. KONKAKAF FIFAga murojaat qilib, JCH-2026 mezbonligi masalasini tezroq aniqlanishini so‘ramoqchi. Reglament bo‘yicha mezbon 2020 yilda FIFAkongressida aniqlanishi kerak.
KONKAKAF vakillari shu yilning may oyida bo‘lib o‘tadigan FIFA kongressi oldidan barcha 221 a’zo mamlakatlarga taklif yuborib, jarayonni tezlashtirishni taklif qilganlar.
Konfederasiya amaldorlari AQSH, Kanada va Meksikaning hamkorlikda bergan arizasining texnik ikir-chikirlari (stadionlar, mehmonxona va transport infrastrukturasi) bayon qilingan hisobotni olti oyda tayyorlab topshirmoqchilar.
Agar ariza FIFA talablariga mos kelsa, JCH mezbonligi darhol bu uch mamlakatga berilishi mumkin. Agar ariza ma’qullanmasa, mundial mezbonligini aniqlashning an’anaviy usuli davom ettiriladi.
Bu kabi tezkor saylov 48 ta terma jamoa o‘tkaziladigan JCH-2026 oldidan FIFAga yengillik tug‘dirishi mumkin. Mezbonni muddatidan oldinoroq aniqlash, boshqa masalalar bilan xotirjam shug‘ullanish imkoniyatini beradi.
