Argentina terma jamoasi sobiq bosh murabbiyi Edgardo Bausa ta’kidlashicha, uning iste’foga chiqishiga Lionel Messining hech qanday aloqasi yo‘q.

«Messi? Men u uchun maydonda ideal joy topishga harakat qildim. Nazarimda, o‘ng tomonda u o‘zini yaxshi his qiladi. Men unga shunday variant taklif qildim, u esa rozi bo‘ldi.

U menga tarkibda kim o‘ynashi kerakligi, kim o‘ynamasligi kerakligi haqida hech qachon gapirmagan. U jamoadoshlarini tanqid qilmagan. Men u bilan o‘yinni, raqiblarimizni muhokama qilgandik. Shuni aniq aytishim mumkinki, mening iste’foga chiqishimga Messining hech qanday aloqasi yo‘q.

Terma jamoadan ketishim kerakligini bilganimda, xafa bo‘ldim. Ishonchim komil, biz JCH-2018 yo‘llanmasini qo‘lga kirita olardik», – dedi Bausa.

Ta’kidlash lozim, avvalroq Messi murabbiyning iste’foga chiqishini talab qilgani haqida xabarlar tarqalgandi.