Аргентина терма жамоаси собиқ бош мураббийи Эдгардо Бауса таъкидлашича, унинг истеъфога чиқишига Лионель Мессининг ҳеч қандай алоқаси йўқ.

«Месси? Мен у учун майдонда идеал жой топишга ҳаракат қилдим. Назаримда, ўнг томонда у ўзини яхши ҳис қилади. Мен унга шундай вариант таклиф қилдим, у эса рози бўлди.

У менга таркибда ким ўйнаши кераклиги, ким ўйнамаслиги кераклиги ҳақида ҳеч қачон гапирмаган. У жамоадошларини танқид қилмаган. Мен у билан ўйинни, рақибларимизни муҳокама қилгандик. Шуни аниқ айтишим мумкинки, менинг истеъфога чиқишимга Мессининг ҳеч қандай алоқаси йўқ.

Терма жамоадан кетишим кераклигини билганимда, хафа бўлдим. Ишончим комил, биз ЖЧ-2018 йўлланмасини қўлга кирита олардик», – деди Бауса.

Таъкидлаш лозим, аввалроқ Месси мураббийнинг истеъфога чиқишини талаб қилгани ҳақида хабарлар тарқалганди.