Oliy liga 8-turidan o‘rin olgan “Metallurg” – “Buxoro” (1:2) uchrashuvidan keyin mezbonlar jamoa boshlig‘i Shavkat Saidov o‘z fikrlarini aytdi.

"To‘g‘risini aytsam jamoaning ayni paytdagi ahvoli bizni juda tashvishlantirayapti. Qishqi yig‘indagi holatning yarmiga ham ko‘tarilolmayapmiz. Na darvozabonlarni, na himoyachilarni, yarim himoyachilar va hujumchilarimizni ham tanib bo‘lmayapti. Futbolchilar olti-etti yildan buyon bitta tarkibda o‘ynab kelishayotgan bo‘lsa-da, bu mavsum xuddi yangidan tuzilgan komandaga o‘xshaymiz. Ketma ket mag‘lubiyatlar futbolchilarning ham, murabbiylarning ham ruhiyatini ancha sindirib qo‘ydi. Ehtimol tarkibga “yangi qon quyilishi” kerakmikin? Albatta, murabbiylar shtabi qarab turgani yo‘q. Biz bu omadsizlik botqog‘idan chiqib ketish yo‘lini axtarayapmiz. Muxlislarimiz bizga ishonishlarini istardim. Bizning ko‘chamizda hali albatta bayram bo‘ladi" - dedi Saidov.