Futbol bo‘yicha ushbu mavsum ham borgan sari qizg‘in pallaga kirib bormoqda.
Quyida “Lokomotiv”ning aprel oyida o‘tkazgan o‘yinlari xususida fikr yuritamiz.
“Temiryo‘lchilar” o‘tgan oyda oltita bahsda maydonga tushishdi. Jamoa ikki bor Osiyo chempionlar ligasida ishtirok etgan bo‘lsa, to‘rt marta Oliy ligada kurash olib bordi.
“Lokomotiv”ning aprel oyidagi o‘yinlari:
1. Oliy liga. 6 aprel. “Sho‘rtan” – “Lokomotiv” – 2:0
2. OCHL. 11 aprel. “Lokomotiv” – “Istiqlol” – 1:1
3. Oliy liga. 15 aprel. “Lokomotiv” – “Nasaf” – 2:1
4. Oliy liga. 21 aprel. “Paxtakor” – “Lokomotiv” – 1:2
5. OCHL. 25 aprel. “Lokomotiv” – “Al Taavon” – 4:4
6. Oliy liga. 29 aprel. “Lokomotiv” – “Obod” – 7:0
Bo‘lib o‘tgan o‘yinlarda “Lokomotiv” uch marta g‘alaba qozonib, ikki bor durang o‘ynadi va bitta uchrashuvda mag‘lub bo‘ldi. “Loko” futbolchilari mana shu oltita bellashuvda 16ta gol urib, o‘z darvozalaridan 9ta to‘p o‘tkazib yuborishdi.
Jamoaning 16 goliga quyidagi futbolchilar mualliflik qilishdi:
Marat Bikmayev – 9 gol
Jaloliddin Masharipov – 3 gol
Murod Bobojonov – 2 gol
Sardor Mirzayev – 1 gol
Ikrom Aliboyev – 1 gol
Oyning e’tiborga molik voqealari:
– “Loko” hujumchisi Marat Bikmayev o‘tgan oyda 9ta gol urishga erishdi. U oliy ligada 5ta, Chempionlar ligasida to‘rtta gol urishga muvaffaq bo‘ldi.
– “Lokomotiv” ketma-ket ikki o‘yinda Oliy liganing ikki kuchli jamoasini bir xil hisob bilan mag‘lub etdi. Uyda “Nasaf”, safarda “Paxtakor” 2:1 hisobi bilan mag‘lub etildi. Har ikkala uchrashuvda kiritilgan to‘rt golga Bikmayev mualliflik qildi.
– Afsuski, OCHLda ikkita o‘yin o‘tkazgan “Lokomotiv” ikkalasida ham durang qayd etdi. Avvaliga “Istiqlol” bilan 1:1 o‘ynalgan bo‘lsa, keyin “Al Taavon”ga qarshi bahs 4:4 natijasi bilan yakun topdi.
– Aprelning oxirgi kunlarida “Lokomotiv” o‘z maydonida “Obod”ga qarshi bahs olib borib, 7:0 hisobida zafar quchdi. Va bunday natija “Loko” tarixida ikkinchi bor qayd etildi. “Temiryo‘lchilar” birinchi marta 2015 yil “So‘g‘diyona”ni aynan shu hisob bilan mag‘lub etishgandi.
– Va nihoyat qishki mavsumda jamoamiz safiga kelib qo‘shilgan Murod Bobojonov “Loko” libosida o‘z gollari sonini ochishga muvaffaq bo‘ldi. U “Obod” bilan kechgan bellashuvda ikkita gol urishga erishdi. Unga keyingi o‘yinlarda ham omad tilab qolamiz.
– 29 aprel kuni bo‘lib o‘tgan bellashuvda jarohat olgan ikki futbolchimiz Salamat Qutiboyev va Shuhrat Muhammadiyev yana safga qaytishdi. Bungacha Qutiboyev oxirgi marta “Sho‘rtan” bilan o‘yinda, Muhammadiyev esa Eronda “Istiqlol”ga qarshi maydonga tushgandi.
– Bu yil hisobidan Ma’mur Ikromov birinchi marta “Loko” darvozasini qo‘riqladi. U “Obod” bilan o‘yinda o‘z darvozasi daxlsizligini saqlab qoldi. Qolaversa, penalti qaytarishga muvaffaq bo‘ldi.
