“Bunyodkor” FK rahbariyatida o‘zgarishlar amalga oshirildi.

Bugun ertalab klub qarorgohida yig‘ilish bo‘lib o‘tdi. Unda klub bosh direktori Murodjon Aliyev jamoa a’zolariga yangi bosh murabbiyni tanishtirdi.

“Bunyodkor” bosh murabbiyi lavozimiga Mirjalol Qosimov tayinlandi. Murabbiylar shtabida Mirjalol Qo‘shoqovichga Aleksandr Volkov va Shuhrat Maqsudov yordam beradi.

Futbol jamoatchiligi yaxshi biladiki, Mirjalol Qosimov o‘zbek futboli tarixidagi eng yaxshi futbolchilardan biri, yoshlar o‘rtasida yevropa va jahon chempioni, O‘zbekiston va Rossiya chempioni, bir necha bor kubok sohibi, yilning eng yaxshi futbolchisi va boshqa sovrinlar egasi. Mirjalol Qo‘shoqovich avval ham “Bunyodkor” FKda faoliyat yuritgani ko‘pchilikka yaxshi ma’lum. U “Bunyodkor” bosh murabbiyi sifatida bungacha 191ta uchrashuv o‘tkazib, bu borada rekordchi hisoblanadi. Uning qo‘l ostida “Bunyodkor” bir necha bor mamlakat chempioni va kubogi sohibi bo‘lgan. Ikki bor Osiyo Chempionlar ligasi yarim finaliga yetib borgan.

Yig‘ilishda jamoa a’zolariga “Bunyodkor”ning avvalgi mavqeini tiklash hamda Osiyo Chempionlar ligasining kelasi mavsumiga yo‘llanma olish vazifasi yuklatildi.