Mamlakatimiz mezbonlik qilayotgan Boks bo‘yicha Osiyo chempionatining yarim finalining kunduzgi bahslari nihoyasiga yetdi.
52 kg vazn toifasida ringga ko‘tarilgan hamyurtimiz Jasurbek Latipov qo‘shni davlat vakili qozog‘istonlik Azamat Issakulovni mag‘lub etdi va final yo‘llanmasini qo‘lga kiritdi.
Ushbu bokschimiz 7 may kuni bo‘lib o‘tadigan final jangida janubiy koreyalik Inkyu Kimga qarshi jang qiladi. Ma’lumot o‘rnida, Janubiy Koreyadan tashrif buyurgan bokschi yarim finalda filippinlik Daniyel Maamoni uch raund davom etgan jangda ochkolar hisobi bo‘yicha mag‘lub etdi.
56 kg vazn toifasidagi dastlabki yarim finalda Murodjon Ahmadaliyev janubiy koreyalik Yon Xun Xanga qarshi ringga ko‘tarildi.
Hamyurtimizning ustunligida o‘tgan ushbu bahs kutilganidek O‘zbek o‘g‘lonining sof g‘alabasi bilan yakunlandi. Murodjon Ahmadaliyevning bu galgi raqibi ikkinchi raunddayoq nokautga uchradi.
60 kg vazn toifasida Elnur Abduraimovning Xitoy terma jamoasi vakili Jun Shanga qarshi jangini tomosha qilishdi.
Uch raund davom etgan bahsda Elnur Abduraimov ochkolar hisobiga raqibi ustidan g‘alaba qozonishga erishdi.
75 kg vazn toifasida biroz avval yakuniga yetgan bahsda hamyurtimiz Isroil Madrimov qozog‘istonlik Abilxon Amankulga qarshi ringga ko‘tarildi. Reyting bo‘yicha o‘zidan bir pog‘ona baland bokschiga qarshi kurashgan bokschimiz yakunda g‘alaba qozondi va final yo‘llanmasini hal qildi.
Bektemir Meliqo‘ziyev ham Boks bo‘yicha Osiyo chempionatining final jangiga yo‘llanmani qo‘lga kiritdi.
Biroz avval yakuniga yetgan 81 kg vazn toifasidagi yarim final jangida xitoylik Huan Jyabinga qarshi ringga ko‘tarilgan bokschimiz raqibini ikki daqiqada mag‘lub etdi. Ketma-ket zarbalarni qabul qilib olgan Chin yurti vakili jangni davom ettira olmadi.
Kechki dastur soat 18:00dan boshlanadi. Unda yana to‘rt bokschimiz final yo‘llanmasi uchun ringga chiqadilar.
Kechki dastur (18:00)
18:00. Hasanboy Do‘smatov (O‘zbekiston) – Amit (Hindiston)
18:40. Iqboljon Xoldorov (O‘zbekiston) – Bekdavlat Ibragimov (Qozog‘iston)
19:00. Shaxram G‘iyosov (O‘zbekiston) – Sajjad Kozimzodaposhtiriy (Eron)
19:30. Bahodir Jalolov (O‘zbekiston) – Muhammad Mulayes (Suriya)
