Boks bo‘yicha Osiyo chempionati yarimfinalida yana to‘rt bokschimiz muvaffaqqiyat qozondilar.

49 kg gacha bo‘lgan vazn toifasida Hasanboy Do‘smatov Hindistonlik bokschi Amitni mag‘lub etdi.

64 kg gacha bo‘lgan vazn toifasida Iqboljon Xoldorov qozog‘istonlik kuchli raqibi Bekdavlat Ibragimovni ajoyib tarzda mag‘lubiyatga uchratdi.

69 kg vazn toifasida ringga ko‘tarilgan bokschimiz Shahram G‘iyosov Eron vakili Sajjid Kozimzodaposhtiriy bilan final yo‘llanmasi uchun kurash olib bordi. Uch raund davom etgan bahsda bokschimiz yaqqol ustunlik bilan g‘alaba qozondi va final yo‘llanmasini naqd qilib qo‘ydi.

Super og‘ir vazn toifasida O‘zbekiston sharafini himoya qilayotgan Bahodir Jalolov Boks bo‘yicha Osiyo chempionatida yengilmas bokschi ekanligini yana bir bor isbotladi. Suriya vakili Muhammad Mulayesga qarshi ringga ko‘tarilgan bokschimiz o‘zining dahshatli zarbalari bilan raqibni qiyin ahvolga solib qo‘ydi. Ikki daqiqa ham davom etmagan jangda hamyurtimiz muddatidan avval g‘alabani qo‘lga kiritdi va finalga yo‘l oldi.

Shu tariqa, 9 bokschimiz musobaqa finalida jang olib boradigan bo‘lishdi.