“Al-Ayn” – “Bunyodkor” uchrashuvi oldidan tashkil etilgan matbuot anjumanining birinchi qismida “qaldirg‘ochlar” ishtirok etishdi. Unda bosh murabbiy vazifasini bajaruvchi Viktor Karpenkoga yarim himoyachi Otabek Shukurov hamroxlik qildi.
- Viktor Karpenko: Avvalo, bizni iliq kutib olishgani uchun “Al-Ayn” klubiga jamoamiz nomidan minnatdorchilik bildirib o‘tmoqchiman. Raqibimiz Osiyoning bugungi kundagi eng kuchli klublaridan biri hisoblanadi. Buni ular keyingi bosqich masalasini muddatidan oldin hal etib, isbotlab qo‘yishdi. Lekin biz raqibni hurmat qilsak-da, ularga munosib qarshilik ko‘rsatishga harakat qilamiz. Umuman olganda, g‘alaba uchun maydonga tushamiz. Har qanday jamoa o‘yindan oldin g‘alaba qozonish haqida o‘ylaydi. Qolgani maydondagi kurashdan keyin ma’lum bo‘ladi. “Bunyodkor”ning bugungi holatdagi eng asosiy e’tibori ichki musobaqalarga qaratilgan. Biroq 2017 yilgi Osiyo Chempionlar ligasini ham munosib yakunlab qo‘ymoqchimiz. Ertaga klubimiz obro‘si uchun kurashamiz. Barqaror o‘yin ko‘rsatib, hamjihatlikda harakat qilsak maqsadimizga erishamiz. “Al-Ayn”ning kuchli va kuchsiz jihatlarini o‘rganib chiqdik. O‘z navbatida raqib ham bizni kuzatgani tabiiy. O‘ylashimcha, ertaga imkoniyatlardan oqilona foydalangan jamoa g‘alaba qozonadi, - deydi Viktor Karpenko.
- “Al-Ayn” juda kuchli raqib. Shunday bo‘lsa-da, g‘alaba qozonish uchun maydonga tushamiz. Tarkibimizda yosh futbolchilar ko‘p. Lekin tajribali raqiblarimizdan cho‘chimagan holda kurashga tayyormiz, deya olaman. Ertangi uchrashuv natijasi ikkala jamoa uchun ahamiyatsiz bo‘lsa-da, baribir o‘rtada xalqaro uchrashuv degan maqom bor. Ortimizda bizga ishonch bildirayotgan muxlislarimiz bor. Vatanimiz sha’ni, klubimiz obro‘si uchun to‘p tepamiz, - deydi Otabek Shukurov.
