Hozirda bundesligada ishlari sira yurishmayotgan «Bayer»ning mavsum-2001|2002dagi holati esingizdami? O‘shanda «dorishunoslar» o‘z tarixlaridagi eng yorqin o‘yinlar bilan ko‘zga tashlanishgandi. Biroq shu eng yaxshi mavsum klub muxlislariga misli yo‘q alam hamda og‘riqli xotiralar taqdim etgandi. Chunonchi, «sherlar» may oyini CHL va Germaniya kubogi finalchisi, shuningdek, bundesliga peshqadami maqomida qarshi olishganiga qaramay, yakunda har 3ta turnirda «atigi» ikkinchi bo‘lish bilan cheklanishgandi. Oradan roppa-rosa 16 yil o‘tgach, «Futbol» haftanomasi leverkuzenlik o‘sha «omadsiz» yigitlarning ayni payt qanday yumushlar bilan shug‘ullanishayotganiga qiziqib ko‘rdi.
Xans-Yorg BUTT (42 yosh). Penaltichi-darvozabon. «Oldenburg» bilan ikkinchi bundesligaga chiqqanidan keyin 1997 yili «Gamburg» safiga qo‘shilib, 4 mavsum davomida 19ta golga mualliflik qilgan.
Leverkuzen jamoasi bilan esa erkin agent sifatida shartnoma tuzib, Rene Adler sahnaga ko‘tarilgunicha asosiy kiper rolini ijro etgan. 3ta klub safida «Yuve» darvozasiga 3ta gol urgan. Faoliyatini «Bavariya»da yakunlab, 2012 yilgacha Myunxenda o‘smirlarni shug‘ullantirdi. Hozir - tadbirkor.
Tomas BRDARICH (42 yosh). Germaniyalik hujumchi bundesligaga «Shtutgart» tarkibida qadam qo‘ygan. Keyinchalik «Fortuna» (Dyusseldorf) va «Fortuna» (Kyoln)da o‘ynagach, «Bayer» safiga qo‘shilib, 1999-2003 yillar oralig‘ida «dorishunoslar» sharafini himoya qilgan.
Butsalarini mixga ilgach, Minskning «Dinamo» hamda o‘zimizning «Bunyodkor»da ishladi. Hozir - «Shkendiya» (Makedoniya) murabbiyi.
LUSIO (38 yosh). Braziliya termasida yetakchi markaziy himoyachi maqomida to‘p surgan futbolchi ham ko‘plab klubdoshlari kabi «Bavariya»ga o‘tish asnosida bundesliganing 3 karra chempioniga aylangan. CHL kubogini yutish orzusi esa «Inter»da ro‘yobga chiqqan.
E’tiborlisi, «neradzurralar» finalda aynan myunxenliklardan ustun kelishgandi. Hozir - Hindistonda o‘ynamoqda.
Mixael BALLAK (40 yosh).
