Mana, oliy liga-2017ning uchdan bir qismi ham ortda qoldi. Joriy mavsum klublarning turnir jadvalidagi holatiga nazar tashlasak, grandlarda biroz pasayish bo‘lgani, aksincha, o‘rtamiyona hisoblangan jamoalarda nisbatan o‘sish kuzatilgani ko‘zga tashlanadi.
O‘z navbatida, har bir o‘yinda o‘z hisobiga gol yozib qo‘yayotgan to‘purarlar hamda ularni samarali uzatma bilan ta’minlayotgan futbolchilar ham bisyor.
Dastlabki 10ta tur natijalariga ko‘ra, hozircha gol}pas tizimi bo‘yicha «Lokomotiv»ning ikki vakili yetakchilik qilayotgan bo‘lsa, kuchli uchlikni «Nasaf» hujumchisi Dragan Cheran yakunlab turibdi.
Quyida ushbu mavzu bo‘yicha statistikaga batafsil to‘xtalamiz.
HAR IKKI JABHADA YETAKCHI
«Lokomotiv» libosida maydonga tushgan deyarli har bir o‘yinda raqib darvozasini ishg‘ol qilayotgan Marat Bikmayev nafaqat to‘purarlar jadvali, balki gol+pas ro‘yxatida ham yetakchilik qilmoqda.
Aksariyat bahslarda jamoasi g‘alabasini ta’minlagan gollarga mualliflik qilgan tajribali hujumchi «Obod» (7:0) va «Navbahor» (2:2)ga qarshi kechgan o‘yinlarda sheriklarini samarali uzatma bilan ta’minlagan.
Bikmayev joriy mavsum oliy ligada 9ta uchrashuvda jami 680 daqiqa harakat qilib, o‘z hisobiga 10ta gol yozdirib qo‘ygan. Tahsinga loyiq ko‘rsatkich.
Maratning jamoadoshi Jaloliddin Masharipovning bu boradagi ko‘rsatkichi ham ajoyib.
«Lokomotiv» libosida 8ta bahsda 657 daqiqa to‘p surgan tezkor vingerning hisobida hozircha 5ta gol bor.
O‘zi ishtirok etgan bahslarda sheriklari urgan gollarga 4 marotaba hammualliflik qilishi Masharipovga gol}pas reytingida ikkinchi pog‘onani tuhfa qildi.
Yuqori uchlikdan shuningdek, «Nasaf» legioneri Dragan Cheran ham joy egalladi.
«Ajdarlar» safida 9ta o‘yinni to‘liq maydonda o‘tkazgan serbiyalik hujumchi 6ta holatda raqib jamoalarini o‘yinni maydon markazidan boshlashga majbur etgan.
Shuningdek, «So‘g‘diyona»ga qarshi kechgan bahs (4:0)da samarali uzatma muallifiga aylangan.
Gol+pas ro‘yxatining kuchli beshligini «So‘g‘diyona» yetakchisi Sanjar Rashidov hamda «Qo‘qon-1912» a’zosi Filipp Rayevas yakunlab turishibdi.
Jizzaxliklar sardori 9ta bahsda jami 785 daqiqa o‘ynab, 5ta to‘p kiritgan bo‘lsa, 10ta uchrashuvda 784 daqiqa to‘p surgan qo‘qonliklar legioneri hisobida ham shuncha gol bor.
Faqat Rashidovning samarali uzatmalari soni bitta ko‘p va tabiiyki, u yuqoriroqdan joy olgan.
Quyidagi jadvalda gol+pas bo‘yicha dastlabki 20ta o‘rinni egallab turgan futbolchilar va ularning ko‘rsatkichlari aks etgan.
